Democracy Thupitnak (Sungmuril)

Pu No Than Kap: “Democracy (mipi uknak) ih thupit le ṭhatnak sungmuril cu, hmuhdan le duhdan bangaw lo umkhawm thiam ih khuaram hrang a ṭhabik hawltlang a si.

Fimkhur, Federal Democracy hrangah hnaṭuan taktaktu tla cun, “Kei thawn bangaw lo cu ka doral” timi kan fehpi pang asile “ultra-fascists lole hyper-communists” bangin, fapa in mai piannak nulepa le unau tiang hua ih that ngam dinhmun thlen pang a awlte. Cuvek cu democracy duhtu pawl tuahdan a silo.

Kan hmuhdan vek hmu ve lo, kan duhzawng duh velo midang kan theihthiam ih an hmuhdan khal a dik sawn thei, a ṭha sawn thei, ti kan ruat thiam tlunah hmuhdan “bangawknak zawnte” hawl thiam sawn ding a si. Cutin kan hmuh thiam asile democracy sungmuril kan kai ngah tinak a si.

Democracy duhtu mipitling cun, pawmdan le hmuhdan dang neitu pawl thawn an “bangawk lonak” hnakin “bangawknak zawnte” hawlin hnatuan tlang an thiam. “Ka hmuhdan thawn bangaw lo, hmuhdan dang neitu cu ka doral” lole, “Kei thawn bangaw lo cu ka doral” timi hi mipitling lungput a silo.

Hivek lungput kan neih miin in tenauter, in fateter. Hivek hmuhdan cun rampi le miphun thansonak tiang a khampit theu. Culawng a silo, Democracy sungmuril a kalh in a siatter.

Curuangah, democracy ramah hmuhdan le policy bangaw lo Party phunphun (multi-parties) din siang a si ih, parliament (Hlutdaw) khalah “Uktu party (ruling party)” tlinlonak rak hawl, rak aukhum ih rak dodaltu hmuhdan dang nei “Eptu party (Opposition party)” a umnak san a si. Democracy cakin nung ringring thei dingah party pakhat lawng a cakbik ringring a ṭha lo, a caktuk a sile ṭihnungzet party pakhat duhdan lawngih lairel “Party pakhat lalnak (One party dictatorship)” ah a cang thei.

Hivek cu democracy dan ih mipi hriltlin mi si cingin, mipum tam sawn in Lalsual (tyrants ) vekin mipum mal sawn ukbettu ah can a theih. Hivek silo dingah Eptu party an cak ve a ṭulnak san a si! Democracy duhtu le Ram le miphun riantu si cingin Democracy sungmuril a ṭhatnak, a manneihnak le hlutnak, a nawmnak le danglamnak tep bantu kan si cio saduhthat phahin!

Be the first to comment

Leave a Reply

Your email address will not be published.


*