Doawknak Ah PDF A Thi, Online Parah A Zuk An Tarlang Ruangah A Pa An Kai

Taninthayi, Palaw Township, Pa Wut Kone khua ih umhmun khuar ralhrang pawl cu July 13, 2022 ah tualsung mipi ralkap pawlin an va kap ciamco. Zingpit nazi 5:00 hrawngah KNDO le Palaw-PDF pawlin an va kap ih ralhrang 10 hrawng an thi.

Mipi ralkap lamah mi 3 an thi, mithi lakah tlangval kum 20 mi Saw Wa So khal a tel. Saw Wa So ih thih thuhla cu a zuk thawn online parah an tarlang ih a thih hnu ni 3-nak ah hringtu a pa kum 50 mi U Tun Min Lat cu ralhrang pawlin an va kai.

PDF ṭuanvo neitu in, “Online parah Saw Wa So ih zuk an tarlang ih a pa an kaih phah. A pa cu Dawei khua ah aum, ralkap motor 3 in an va kai. Khuitawk hmun ah an hruai ti an thei lo, a innsang pawl khalin an pehtlaih thei nawn lo” a ti.

Myanmar ramsung buai hnuah Saw Wa So cu PDF ah a lut, PDF ih a lut thuhla khal a innsang pawlin an thei lo. PDF a lut hnuah a innsang pawl cu Palaw khua an suahsan ih Dawei khua ah umhmun an va khuar.

Khuami pakhat in, “A fapa in mual a liamsan ih a pa an kai. Ka tuarpi tuk. An inn ah ralhrang pawl an ra ih U Tun Min Lat na si maw?’ ti an sut ih si ee a ti hnuah thusut ding aum in thlun aw an ti. Ziangsi thu in sut ding a tiih ralkap in zianghman in sut ve hlah, na phone kha in pe awla in thlun aw tin an hruaisuak” a ti.

Tuini tiang U Tun Min Lat ih thuhla cu a innsang pawlin an thei nawn lo ruangah an thinhar tuk, ralhrang pawlin a thuhla zianghman an suah lo.

Be the first to comment

Leave a Reply

Your email address will not be published.


*