Doawknak Tualrawn Ah “Kan Tong Aw Sal Ding” An Ti Nan Thihnak In Thla A Zar, Miralṭha Ih Ankaa

Zuk kan tarlang mi 3 hi Chin ralkap an si. Unau (cousin) an si ih an pale pawl cu unau diktak an si. An hmin cu Salai Sesang, Salai David San le Salai Salawng pawl an si. Khawkhat ih um an si ih khawtlang ih rinsanmi mino an si.

Bawlung sit khal an thiam zet, a lai ih um Salai David San hi ramkulh ramṭhen ih bawlung sit thiam hrilsuah mi arak si nan tu’ahcun ram le miphun hrangah ke pakhat lawng anei. A kehlam le voihlam ih ding a ule pahnih khal dothlennak ah an nunnak a liam.

Salai David San in, “A lai ih um hi keimah ka si. Doawknak tualrawn ah bomb kammi ka pal ngah ih Emergency in Mizoram lamah in tlanpi, ni 4-nak ah siizung kan thleng thei. A caan kel in siizung kan thleng thei ruangah ka damṭha sal, asinan ka ke pakhat cu ka sung.

Thla 3 hnuah ka kehlam ih um ka upa khal doawknak tualrawn ah bomb in a puah ngah. Mizoram lamah an tlanpi hngal nan a hliamhma tuar hi a nasa tuk, lamzin khal a sinpi lo ruangah siizung thlen hlan lamlak ah a nunnak cem. Ziang asikhallen na ṭuanvo na hlensuak a si, ka upa (RIP).

Voihlam ih ding ka upa khal tuisun ah mual in liamsan thu ka thei. Bomb ka pal laiah thanau lo dingin thazang in rak pe rero tu a si. Na hrangah ral kan rak do ding, dothlennak a cem hnuah nehnak thawn kan tong aw sal ding tin thazang in rak pe.

Tu’ah doawknak ah a thih thu ka thei cu ziang rel ding khal ka thei nawn lo. Ka ule pawl cu kum note ram le miphun hrangah an nunnak an hlan, kan ule pawl nan ṭuanvo nan hlensuak a si, hahdamten cawl thlang uh. Ka ule pawl ka lo theihhngilh nawn lo ding. RIP” tin a riahsiatnak thu a tarlang.

Be the first to comment

Leave a Reply

Your email address will not be published.


*