Doawknak Tualrawn Ih Um Ralhrang Pawl Ih Nupi In Pawngsual An Rak Tong

Ralhrang pawl lakah buainak phunphun a thleng. Bago, Taungoo ralkap sakhan ih um ralkap mipa le nunau cu an duhaw ih an umtlang ṭheu. Ralkap nunau cu nau a pai ruangah an pule pawlin sumpai ting 7 an pek hnuah a naupai cu an thlakter.

Ralkap sung ihsin thuthang phursuaktu in, “A naupai cu thla 4 a kim zo, nau thlak cu a duh lo. A pum khal a tum zo, ralkap an ṭuan laiah pasal neih an siang lo. Cun, himi thilthleng ruangah an pule pawl khal tlunlam upa pawlin an hna ihsin an ban thei ruangah a naupai cu an thlakter” a ti.

Ralbawi le ralkap pawlin ralkap nunau pawl cu sumpai an pe ih an itpi ṭheu thu khal a rel. “Ralkap nunau pawl cu an pule, an ṭuanpi mipa ralkap pawlin sumpai an pe ih pahnih lungkimnak in an ittlang. Hlawhhlang vekin an umter, kaphnih lungkimnak ih an tuahmi a si ruangah ralkap lakah cun theilo bangin an umsan” a ti.

Doawknak tualrawn ih um ralkap ih nupi pawl khal an umnak camp sungah pawngsual an rak tong, ṭhenkhat cu ralbawi thawn an uire. Ralhrang nupi pawl lakah pawngsual tong le uire thubuai 5 aum zo ih an buaipi rero lai.

Ralhrang in ramsung thuneihnak an lak hi kumkhat lenglo a si zo, doawknak tualrawn ih an umnak khal kumkhat lenglo a si zo ih ziangtikah an tlungsal ding ti khal theih a si lo. Inn lam ihsin thuthangsia phunphun an theih ruangah an thinheng in an riahsia tuk tin Khit Thit Media thuthang sungah an tarlang.

Be the first to comment

Leave a Reply

Your email address will not be published.


*