Dr. Sasa In People’s Soldiers Hnenah 2,000,000 Zat A Hlu, People’s Soldiers Timi Cu >>>

Dr. Sasa in People’s Soldiers pawlkom hnenah 2,000,000 zat a hlu ih People’s Soldiers khalin lungawithu simnak capi an pe. People’s Soldiers in “National Unity Government of Myanmar ih Union Minister Dr. Sasa in mipi ralkap le an innsang pawl hrangah tin bawmnak sumpai 2,000,000 zat a hlu ruangah People’s Soldiers in kan lungawinak capi kan hlan” tin an tarlang.

People’s Soldiers pawlkom cu Min Aung Hlaing kuthnuai ih hnaṭuan duhlo ralkap tlansuak pawl an si. Min Aung Hlaing in ralkap pawl an tlansuak asilen an nupi fanau pawl a hrem ding thu in a hringhro ṭheu ruangah ṭhenkhat cu an tlansuak ngam lo.

People’s Soldiers pawlkom aum hnu ihsin an nupi fanau pawl hruai in an tlansuak ih People’s Soldiers hnenah an va beu. People’s Soldiers in an ṭulsammi ziangtinkim an rak buaipi thluh, an harhdamnak khal an zohsak ih an fale pawl hrangah fimthiam zirnak an pe.

People’s Soldiers pawlkom a semsuahdan: Min Aung Hlaing in Myanmar rampi thuneihnak a lak hnu February 28th ah Captain Nyi Thuta in thuthluknak a tuah ih Naypyidaw ralkap hmunpi ihsin a tlansuak. Captain Nyi Thuta in “Ralkap in sualnak neilo mipi pawl an hrem, an vuak, an that lai ka hmuh tikah ka thinlung a kekkuai. Mipi pawl humhimtu ding kan si nan mipi pawl an hrem sawn” a ti.

Hmunhimnak ah a tlan ih ralkap tlansuak ṭhenkhat thawn an tongawk hnuah People’s Soldiers a piangsuak. Captain Nyi Thuta in “Min Aung Hlaing kuthnuai ih um ralkap tam zet cu an tlansuak duh lo nan an innsang pawl an ruat ruangah an tlansuak ngam lo. An tlansuak theinak dingah lamzin ka onsak duh” a ti.

People’s Soldiers pawlkom aum hnu ihsin ralkap/palik tam zet cu an nupi fanau pawl hruai in an tlansuak rero zo. September thla ih tlansuak ralbawi pakhat in “Captain Nyi Thuta ih thusimnak cu a thupten ka rak ngai ih thuthluknak felfai tuah dingin thazang in pe, curuangah ka tlansuak ih People’s Soldiers hnenah ka um” a ti.

Be the first to comment

Leave a Reply

Your email address will not be published.


*