Eaindra Kyaw Zin In A Sersuah Mi ‘Perfume’ A Tuah Thei Nawn Lo Ding Thu A Phuang

Kum 45 mi Eaindra Kyaw Zin cu Myanmar lemcan thiam le model hminthang a si. A pasal Pyay Ti Oo (kum 43) khal lemcan thiam hminthang a si, Eaindra Kyaw Zin Merchandise Team fehtlang in perfume sersuahnak an nei.

Ralhrang in ramsung thuneihnak an lak hnuah lamzawhnak ah an nupa in an tel ṭheu ruangah ralhrang pawlin an kai, an suah zalen hnuah ‘perfume’ cu a tuah peh thei nawn lo ding ruangah company dang hnenah a zuar thu mipi hnenah simthannak a nei.

Eaindra Kyaw Zin in, “Nan zaten cibai, Eaindra Kyaw Zin Merchandise Team ihsin thu pakhat ka lo sim duh. Kumhnih liamzo ihsin ka duhdawt zet mi mipi pawl hrangah perfume sersuah dingin ka rak tawlrel. Asinan, tu’ahcun ka harhdamnak a ṭha lo ruangah ka tuah thei nawn lo ding.

Cun, perfume cu a ni cem thei ruangah ni reipi sung ret a theih lo. Curuangah Beauty Diary Co.Ltd hnenah ‘perfume’ hi ka hlan, Beauty Diary pawlin ka perfume hi an zuar thlang ding.

Beauty Diary in an zuar tikah harsat zet ih ka rak sualsuak mi a si ruangah thazang rak pe cio uh. Mipi pawl ka lo ngai tuk, kan tonawk lohli theinak dingah ka harhdamnak hi ka kilkhawi ṭhat a ṭul” tin a Facebook cahmai ah a tarlang.