Facebook Comment Pakhat Ruangah Fala Le Tlangval Cu Ni 6-nak Ah An Neiaw

Facebook comment pakhat ruangah fala le tlangval an duhaw ih an neiaw ti cu thilmak zet a si, thilumdan kan zohtlang hnik ding. Africa, Nigeria tlangval Chidimma Amedu in a facebook cahmai ah nupi neih a duh thu a tarlang.

“Kum ka kim zo ih kan caan hmanliam men ka duh lo ruangah ka nupi si duh pawl cun in sim thei uh. January 6 sun ah kan neiaw ding, tuizan nazi 12:00 ah nupi ka hawlnak cu ka kharsal ding” tin a tarlang.

Online mipi pawlin capoh ah an rak ruatsak ih an comment ciamco ih an nuamaw zet, fala Sophy Ijeoma khalin capoh ca post men ah a ruat ih “Ka duh ee, ca in kuat hngal aw…lols” tin a comment.

Midang khalin an comment cece nan Chidimma Amedu in Sophy Ijeoma cu a ngaina cih ih inbox ah ca avun kuat ngaingai ih an umnak a sut. Khua dangdang ih um an rak si ih an umnak cu a hlaaw zet, an umnak cu 500km (300 miles) in a hlaaw.

Ni 2-nak ah Chidimma Amedu cu a poksuak ngaingai ih online sungih fala Sophy Ijeoma tei khua ah ava feh. Sophy Ijeoma in “Ka hmuhmi mipa lakah cun a mawi bik, ka hmuh veten ka duh cih” a ti, bazar ah an tongaw ih thunuam an reltlang.

Chidimma Amedu khalin a comment a hmuh veten arak uar zo, nazi 2 sung an biakawk hnuah Chidimma Amedu in a innsang pawl tong dingin a sawm ih an va feh. Chidimma Amedu in a innsang pawl theihternak a tuah lai caan khalah Sophy cun capoh men ah a ruat lai.

Asinan, a nulepa in ṭhaten an rak bia ih mo dingah an duh thu an sim veten an thungai ti a thei. Sophy in “Ka hmuh veten ka duh ko, a zun ah ka uai cih. Asinan, in nei tum ngaingai ti cu ka zum thei lo. A pate le a nupi kan va tong hnu lawngah a thungai ti ka thei ih ka cohlang ve” a ti.

A zanlam ah Sophy Ijeoma tei innsang pawl an va tong, hringtu pa a nei nawn lo ruangah a nu an va bia. A nu in a ṭapa sut uh, pa a nei nawn lo ruangah a ṭapa ih thuthu a si arak ti.

A ṭapa in thilumdan pawl a sutfiah hnuah a cohlang ih thlausuah a pe, cutin ni 6-nak January 6 sun ah an neiaw. An neihawk hnuah an duhdawtnak khal nikhat hnu nikhat a parsuak vivo ih nuam zetin hringnun an hmang rero lai.

Be the first to comment

Leave a Reply

Your email address will not be published.


*