Fala An Pawngsual Hnuah An That, Fala Innsang Thuhla Hi An Zangfah Um !!!

Shan State, Muse khawpi ih um fala kum 21 mi cu online sungah motor zuar in hna a ṭuan. A rualpi mipa pahnih in March 12, 2022 simlam ah motor an lei duh thu an bum, Muse fangfai zuarnak building kiangah tongaw dingin an sim thei. Cutin an tongawk veten a rualpi pahnih telin mipa 4 in an kaihrem.

Thlanmual kiangah an hruai ih a kaa le a kut pawl an tawnbet hnuah an sualpi ciamco. A innsang pawl cun rualpi inn ah a riak si ding ti an zum. March 13 zinglam nazi 11:00 hrawngah tualsung mipi pawlin Christian thlanmual ah nunau ruak an sar ih a innsang pawlin an va zohdik hnuah an fanu a si ti an thei. Simlam ah sualtuahtu mi 4 khal palik pawlin an kai thluh.

An sungkhat in, “Ka tunu hi a burpi ih an sualpit rero laiah a thi. Minung pathum in an sualpi hnuah a thi, palinak ih a sualpi hlanah a thi zo” tin media hnenah a sim thei. A ruak an hmuh tikah cun a hmai a thling ih bawngbite a hruh lo, a taksa khal a siat. Tulai hi Muse ramsung ah ritheihsii tham, rukru le suamhmang an tam zet.

June 8, 2022 ah court in an thubuai hi relsak ding a si nan an relsuak thei lo, an kaihmi 4 cu zohdiknak khal an nei thei hrih lo ih thawnginn sungah an khum men. Mual liamtu fala tei innsang hi an zangfah um zet. A nulepa in dawr khan an nei, an fanu ih thilton hnu ihsin thil leitu an nei nawn lo.

An vengsung mipi pawlin an pehtlaih duh nawn lo. A tantami a nulepa, a innsang pawl cu ningzak, ṭih thlaphang in an um ih hmun dangdang ah an tlanhlo thluh. Mipi tong ding khal an ngam nawn lo. Vengsung khalah an um ngam nawn lo. An sungkhat in, “Hringtu a nu cu May 12 ah a tlannak hmun ah a thi zo. A pa khal a tlannak hmun ah damlo besia in aum, a dinhmun cu a ṭha lo tuk.

Kan dung June 8 sun ah court ah ka va feh. Thuṭhentu lawyer in himi pawngsual thubuai cu siibawi ih zohdiknak, tetti kimcang aum hnu lawngah kan rel thei ding a ti. Siibawi khal caan reipi sung kan hngak zo nan tetti zianghman a tuah thei hrih lo, a innsang pawl cu lungkuai in an um thluh. Thudik phosuah theinak dingah zangfah ka lo dil” tin media hnenah a sim thei.

Be the first to comment

Leave a Reply

Your email address will not be published.


*