Fala Le Tlangval Duhdawt Aw Zet Cu PDF Ah An Lut, Doawknak Tualrawn Ah A Tlangval An Kap That Cu A Lungthin A Kuai

September 20 sun nazi 12:00 hrawngah Kayah State, Dimawso ramsung ah mipi kilhimtu KPDF le ralkap pawl an doaw ciamco. KPDF lamtang pakhat in, “Sun nazi 12 hrawng ihsin kan doaw thok ih, nazi 2 sung kan doaw. Ralkap pawlin umhmun an ra khuar ruangah kan kapaw, minung thazang le ralthuam thazang kan thlauaw deuh ruangah dung kan sip lawk.

PDF pakhat a thi ih hliamtuar 4 an um, 2 cu kan pehtlaih thei hrih lo ih an hlo. Ralkap pawlin doawknak tualrawn silo khua sung lam khalah meithal le pukpi pawl an kap lut ciamco” a ti.

Doawknak ih hlo PDF pahnih cu fala le tlangval an si ih fala sawn Hlaing Pwint Phyu (Jan) cu damten an hmusal, asinan a tlangval Sai Bhone Min Thant cu ralkap pawlin an kap that ih a ruak lakdan ding an tawlrel rero lai.

PDF pakhat in, “Manisun kan doawknak ah PDF pahnih an hlo, mipa le nunau an si. Nunau sawn cu tuizing nazi 9:00 hrawngah kan runsuak thei zo” a ti. PDF nusalṭha cu hliamhma na tuk a tuar lo nan thlaphang in aum rero lai.

Hlaing Pwint Phyu (Jan) in, “Sai Bhone Min Thant, hnemawknak ding ka nei nawn lo. Kan thlennak a rei hrih lo ih doawknak ahcun tel hrih hlah aw ka ti rero nan a feh cak tuk ruangah Jan khal doawknak ih telve dingin in sawm. Kan van ava duai lawmman ve, ka mithmuh rori ah mual in liamsan maw, zankhat le zinglam sung cu tupi sungah keimahten ka vakvai.

Nazi tampi sung khuathim lakah ka vakvai ih na tel nawn lo ruangah ziangtlukin ka cau, ka lungthin a kekkuai ti cu in hmu thei maw. Ziangah in fehsan, a tha bikin ka rak lo humhim thei lo cu ka damsung in ka ngaithiam aw nawn zik lo. Kan theihawk pek ihsin kan tlanni tiang in rak humhim ih in ngaihsaknak parah ka lungawi tuk” tin a facebook cahmai ah a tarlang.

Be the first to comment

Leave a Reply

Your email address will not be published.


*