Fala Le Tlangval Thunuam An Rel Laiah Misual Pawlin An Suam

Mandalay peng, Meiktila lamzin kap ah fala le tlangval tuakkhat an totlang ih thunuam an rel laiah misual pathum in an suam.

Tualsung mi pakhat in, “May 24 sun ah fala le tlangval cu thunuam rel in an to, mino pathum in an va tibuai ih nam in an sat. An pahnih in hliamhma an tuar veve, fala ih paisa bawm an laksak. An tonak hmun hi minung um tamnak hmun a si nan suamhmang pawl an cangvai ngam thotho” a ti.

Kiangkap ih um mipi pawlin an rak hmu ih suamhmang pahnih cu an kai ngah, pakhat cu a tlanhlo man. Palik pawl an ko ih suamhmang pahnih cu an hruai.

Khuami pakhat in, “Meiktila khuasung ah suamhmang an tam zet. Simlam nazi 5:00 ihsin cun vahsuah khal a cii nawn lo, zan nazi 7 & 8 hrawngah cun suamhmang pawl an cangvai nasa tuk. Minung um tamnak hmun khalah suamhmang pawl hi an cangvai ngam zo” a ti.

May 22 sun khalah suamhmang mi 5 in bike thawn phuraw pafa cu nam in an sat ih an bike, sumpai le phone pawl an lonsak.