Falam Covid-19 Dinhmun (June 17, 2021)

Falam ah Covid-19 nathrik cu May 20, 2021 ah hmu saal thok a siih June 1 ihsin June 16 (Mizaan) tiang a pehpeh in nat neitu nitin hmu rero a si. June thla sungah ni 16 tiang Covid minaa 98 siizung an um zo ih mithi 5 an um zo, atu Falam siizung ah Covid-19 minaa 67 cu tuamhlawm rero laifang an si.

Falam siizung ih Oxygen Plant cu kan hmang thei rero hrih ruangah oxygen thun saal in semrem ten tawlrel theih a si hrih. Asinan minaa an karh vivo ih siizung ah hmunhma a daih nawn lo tikah nat ngahtu a besia tuk lomi pawl cu inn lam ah oxygen hawp ter in tuamhlawm țul dinhmun a si thlang.

Oxygen bur kan nei tam ahcun inn lam khal ah kan hmang thei dingih a cem ahcun siizung ah thun saal theih a si ding. Curuangah Falam a ngeihventu pawl in CRCDF thawn pehtlaih in Covid-19 nat dokhamnak ding hrangah țuan tlaang dingin kan lo sawm a si.

Thilri in țanpi a duhtu pawl cun Oxygen bur, PPE, Mask, Test Kit le Vitamin C a tammi sii pawl, sumpai in a kuat duhtu pawl cun CRCDF sumkil Nu Țial Kip Hoi @ Nu Kip hnen ah K-pay (09-257837799) thawn kuat theih ringring a si.

Atufang CRCDF țuanvo neitu pawl cu Hotu pawl ah Pu Dar Lian Uk, Pu Hrang Lawm, Rev. Dr. Joel Za Hlei Kap, Sungțuan pawl ah Salai Nhgepi Thian Uk Thang, Salai Tluang Lian Hre, Rev. Thawng Bik, Sumkil pawl ah Sm Țial Kip Hoi le Sm Ngun Duh Sung pawl tla kan si. Mah le remcannak țuanvo neitu pakhat khat hnen khal ah pehtlaih theih ringring kan si. (#Chin Relief-rehabilitation and Community Development Foundation (CRCDF)

Be the first to comment

Leave a Reply

Your email address will not be published.


*