Falam: Covid-19 Dokhawmnak Hrang Mipi Hnen Ah Zangfah Dilnak

Falam Christian Ministers Fellowship in August 1 ihsin 14, 2021 tiang kharkhum aw hrih dingah zangfah dil.

(1) Falam khuasung Covid-19 dokhamnak ah FCMF ih zangfah dilnak bangtukin June 23, 2021 ihsin July 31 tiang ni (40) sung mah le inn ah um in mipi ih tan nan lak ciarnak parah FCMF in lungawithu kan sim.

(2) Covid-19 nat dokhamnak ruangah sungkhat, kawhhran pi, rualpi tha le khuapi thihhloh toncan khal ah thlakung zawn aw thiamlo, sunnak le sunloihnak khal nei theilo leh thlahawk thiamlo dinhmun kan si cu kan riah a sia zet.

(3) Pathian zangfahnak, mipi zaten le harhdamnak tuanvo nei zaten tankhawmnak ruangah Falam khua sungah Covid-19 natnak a dem deuh vivo tin hmuh a si ih lungawi za ngaingai a si.

(4) Asinan, atu ih Kawhram, kan kiangkap khuapi pawl le Falam dinhmun zoh tikah mipi zalenin tlangleng khawm ih umthei dinhmun kan si hrih lo. Curuangah harhdamnak lam ih hmuhdan hram bunin Falam khuasung mipi August 1-14, 2021 tiang a hnuai lam bangtukin thlun thei hrih ding zangfah kan lo dil bet a si.

(a) Covid-19 nat suan awklonak dingah mah le inn ciar um ding. Innsang nauhak khal midang nauhak thawn lektlang, umtlang lo ding. Loh theihlo lengsuak tul asile hmaihup (mask) bun in a tulnak ah kuthruk (surgical glove) bun tengteng ding.

(b) Bazar kiang le khualak ah to in mibur suahtertu hanghnah hangrah zuar lo ding. (c) Mipi harhdamnak ruat in mibur suaktertu rawldawr, lakphak dawr, zudawr, tvp khar thluh hrih ding. (d) Sa lei duhtu in sa zuartu hnenah phone thawn cah awin mibur suaklo dingten lei awk ding.

(e) Khualak ih hanghnah hangrah le thilri dangdang zuar zemtu cu Covid-19 test cia ih negative a simi lawng in mask le kuthruk thawn zuar/zem ding.

(f) Himi ritekmi ni (1-14 August 2021) sungah mithi (Covid nat silomi tel in) neih pang a sile, sun (khuavang) sung a si ahcun a rangtheibik in a mal theibik mipum vial in vui cih ding; zan (khua thim hnu) ih thi a sile siizung mithi retnak ah ret cih in a thaizingpit ah vui cih ding. (g) Falam khausung ih a bur in hnatuannak hmuahmuah cawl hrih dng.

Sa le hanghnah hangrah leinak hang pehtlaihnak: Sia sa: 09449581489, 09255189591, 09400304747, Voksa: 09400305476, 0945088953. Arsa le nga sa: 0942640760, hanghnah hangrah: 09400305738

Be the first to comment

Leave a Reply

Your email address will not be published.


*