Falam Khua Kiangah Kahawknak Theih A Si

Tuizing August 9, 2021 ah Falam khua kiangah pukpi le meithal awn ciamco theih a si. Cumi hnu nazi 11:00 hrawngah ralkap helicopter pakhat cu Hakha le Falam tlangtluang parah a zamkual rero.

Tuizing August 9 zinglam nazi 7:54 ah CNO/CNDF facebook ah “Falam pengsung ih kahawknak thawn pehpar in thuthang dik le felfai sawn cu CNO/CNDF Page ah tarlang a si ding ruangah tualsung mipi lam ihsin Social Media parah manhlap tukih thuthang thehdarh lo dingin le mipi thlaphang ding zawng hrimhrim in thuthang thehdarh lo dingah zangfah kan lo dil a si.

Kahawknak Hmun, Khaw hmin le CNDF pawl umnak hmun tipawl hrimhrim Social Media parah tarlang lo dingin zangfah kan lo dil a si” tin an tarlang sal.

CNO/CNDF ih thuhla tawi: Thuhmaihruai “Kan Rampi cu a kilkhawi tu ding ih ruatmi kilhimtu pawl sawn riangri in suanlam a phun phun hawl in a ding lai mi acozah cu kaihrem tahrat ih ral an tho tikah mipi pawl cu kaihruai tu le kilhim tu nei lo in cui raltho pawl ih ti duhdah tuar in kan um hai.

Cutikah cui raltho (uico) pawl ih duhduh ih hmuhsuam tuar thei lo pawl cun a miphun, a peng, a khua zawng ti in an hlawm awk khawm thei dan dan hawl in Raltho uico pawl ih ral cu an do let sal hai.

Chin (Falam) pawl an hmunkhat Falam peng sung le Kalay/Kabaw um kan Chin (Falam) mi le sa pawl khal cun Laitlang lairawn ti um lo ih hmunkhat te ih hlawm awk a cu thlang ih an theih ruangah Champhai ah tonawk khawm nak an neih hnu ah CNO/CNDF an din.

CNO le CNDF pehtlaihawk Dan: Chin National Organization cu Falam Peng sung le Kalay/Kabaw um Chin (Falam) mi pawl a tul dan ih zirin Hriamkai ih humhual dingih dinmi Pawlkompi a si. Cui a mi le sa a humhual theinak ding hrang hriamkaitu (ralkap) dingah Chin National Defence Force khal cu Pawlkompi hnuai ah a din cih ve.

CNO cun Chinmi (a bik in Falam mi le sa) pawl kan him theinak dingah activities a phun phun a tuah ding, (peace talk, alliance, fund raising, dialouge, etc. ). CNO in a tlun lam ih activities vial lawng in kan Chin mi sahim nak dingah a tawk lo, hriamkai ih meithal hmetpuak a tul a ti a si len CNDF in cui hriamkai hna cu a tuansuak ding.

Curuangah CNO hrangah CNDF cu a kut le a ke ngai ngai an si. CNDF cu CNO ih hmuitin (Chin mi le sa humhim) hlawh tlin thei nak dingih hriamkai tu Chin (Falam) ralkap pawl an si.

Tuancan bikhiah (Terms): CNO member cun tuanvo lak can term bikhiah a nei ih election tla a term cem zawng ih tuah theu ding a si. CNDF cu hriamkai ralkap an si ruangah Dothlennak a cem hlan sung cu a hna a theh hrih lo ti ih ngai a si. Dothlennak a cem nini ah zo khal CNDF (Chin ralkap) ihsin zalen tak in an suak sal thei. A tuan peh lan duh an um khal a si len a mai duh hril nak in a tuan peh thei.

Sawmnak: Zokhal Dothlennak a hlawhtlin theinak hrang tha le zang rori ih pum ka pe aw duh ti pawl cu CNDF in lungawi sopar ten kan lo hmuak ring ring. Taksa pumrua ih pum pe aw remcang lo hrang khal ah neih mi sum saw (ei le in), thil le ri ih tanpi duh khal kan lo hmuak ring ring.

Ziangkim ih hlawhtlinnak pe thei tu Cung Pathian hnen ih thlacam bawmnak khal nan zaten hnen ih sin kan lo ngen ring ring a si. To be continued (ngan peh ding)

CNO/CNDF thawn pehperawk ih thusutnak tam mi pawl: Falam peng lawng a mah a hran ten CNO/CNDF a rak ding hi a tul maw si? A um cia mi hriamkai pawlkom ih lut cih mei a tha lo maw? Chin state sungum hriamkai pawl pakhat ah nan kom aw thluh thei lo maw?

Dothlennak a theh cun hriamkai tulnak um lai maw si? Ziangah dothlennak a theh hnu khal ah CNO/CNDF nan ding peh vivo tum? Kawl pawl buainak ah kan nih Chin mi in nunnak thap ih rak tel ve a tul maw si? Comment ah na thu sut duh mi rak ngan awla, comment thusutnak ihsin a mal bik pathum san let sal a si ding” tin Kalay Civil Armed Force – Chin Battalion page ah an tarlang.

Be the first to comment

Leave a Reply

Your email address will not be published.


*