Falam Tlawnginn Fehnak Lamzin Kap Ah Hringhronak Ca An Tar Ruangah Nauhak Pawl Tlawngkai Ngam Lo, An Kirsal

Falam, အ.ထ.က (2) tlawnginn fehnak lamzin kap ah zo ti theih lo pawlin hringhronak ca an rak tar. June 14, 2022 zing ah catar mi cu hmuh a si. Tlawngta nauhak pawlin an hmu ih tlawng an kai ngam lo, an kirsal.

Hringhronak ca cu “Tlawng kai hlah, Falam hmin na sia ter. Nan fa pawl ruak nan hmu duh asile tlawng kai ter uh” tin an ngan. June 13 zan khalah tlawnginn kiangah bomb puak awn veikhat theih a si ih cumi hnuah ralhrang pawlin meithal an kap.

A thaizing ah tlawnginn kiangah hringhronak ca an hmu. Himi hringhronak ca thuhla ah tualsung mipi ralkap CNO hruaitu pakhat in, “Himi catar mi thuhla cu kan thei lo. Ralhrang pawl an si thei, mipi lam khal an si thei” a ti. Ralhrang pawlin June 14 ah Falam khuasung ah zan nazi 8:00 hnulam zohman vahsuah an siang lo thu theihternak an suah.

Thudang: Hpakan Ah Duhdawt Aw Mi Fala Le Tlangval Ṭongkam An El’aw Ih Tualthatnak A Thleng
Kachin State, Hpakant khua ah fala le tlangval duhaw cu ṭongkam an el’aw ciamco ih tlangval in a fala cu nam in a dawt that. June 12, 2022 simlam nazi 5:00 hrawngih thilthleng a si. Myoma vengsung ih hnipuan ṭhitnak dawr sungah fale le tlangval kopaw cu ṭongkam an el’aw cimaco ih tlangval in nam in vei tampi a dawt.

Mithmutu in, “Tlangval hi a nauhak sawn. Fala in kan ṭhenaw ding a tiih tlangval in a duh lo, ‘ka lo ṭhen thei lo’ a tiih ṭongkam an el’aw. Fala in a ṭhen tum ruangah tlangval in nam in a dawt, cumi hnuah amah le mah khal nam in a dawt aw” a ti.

Fala kum 26 mi Ma May Thu cu hliamhma nasa zet a tuar ih a thisen khal a suak tamtuk. Siizung lamih an tlanpi lai, lamlak ah a thi. Tlangval kum 25 mi Shan Lay khal amah le mah a dawtawk ruangah hliamhma a tuar ih siizung ah an tuamhlawm rero lai. Himi thilthlennak hmun ah ralkap le palik pawl an va feh ih zingzoinak an nei. June 7 zan khalah Pauk Kone vengsung ah unau thatawknak a thleng, unau rori ṭongkam an elaw ciamco ih a nau sawn in a u cu nam in a sat that.

Be the first to comment

Leave a Reply

Your email address will not be published.


*