Franklin Graham “Ni Neta Ih Um Kan Si, Ralringten Um Uh. Jesuh Ara Sal Cing Ding”

Kan leitlun boruak a sia tuk zo ruangah mipi in Reverend Franklin Graham hnenah ziangtik ah Jesuh ara sal ding? tin an sut. Kum 69 mi Franklin Graham cu rawngbawltu ropi Billy Graham ih fapa a si.

Franklin Graham in “Jesuh ara sal cing ding, ziangtik ah ti cu zohman in an thei lo. Asinan, Bible in a ra sal ding ti cu fiang zetin in simcia. Bible hi siar uhla caan neta ih um kan si ti cu nan thei ding. Ni neta ih um kan si, ziangtik lai caan khalah Jesuh cu ara sal thei ringring ruangah ralringten um uh” a ti.

Cun Matthew 24:44-nak a siar “Curuangah ralring tein um uh, ziangahtile Milai Fapa cu nan rin lo laifangah a ra ding a si”.

Franklin Graham in “Kan zaten Pathian hmaiah kan ding dingih lei parih kan thiltuah mi vekin thuṭhen a si ding, Jesuh Khirh zumtu pawl cu kan sualnak ngaithiam a si zo ruangah kan sualnak pawl cu thuṭhen a si lo ding.

Curuangah leitlun kan um sungah Pathian rawngbawl ding kan si, leitlun thilri pawl ruangah Pathian dungtun ding kan si lo. Jesuh ara sal ding caan kan theih lo ruangah ralringten um uh” a ti. Cun Pathian tong dingih man hrih lo, theifiang aw hrih lotu pawl hrangah thlacamdan khal a zirh.

“Bawipa, misual ka si. Ka sual pawl ka siraw tuk ih in ngaithiam hram aw. Ka sual aiah Na fapa neihsun Jesuh cu a thi ih A thosal ti ka zum. Ka thinlung ah ra um aw, Jesuh hmin in thla ka cam, Amen”.

Be the first to comment

Leave a Reply

Your email address will not be published.


*