Haiti Ram President An That

Americas mual sungih um ram farah bik Haiti ram president Jovenel Moise (kum 53) cu mizan July 6 zan nazi 1:00 hrawngah zo ti theih loin an kap that.

An umnak inn ah an lutchilh ih an kap that, a nupi First Lady Martine Moïse khal hliam nazet tuar in siizung ah an tuamhlawm rero lai. A kap thattu pawl cu zo an si ti an theifiang hrih lo ih tapung pawlkom pakhat khat si an zum.

Vengsung mipi pawlin English le Spanish ṭong an hmang thu an rel ih US Drug Enforcement Administration pawl an tel ding ti an zum. Prime Minister Claude Joseph in an rampi a kaihruai lawk ding.

Palik le ralkap cu hmuntinkim ah an um thluh ih dawr khal an khar. Vanzam khal lut/suak an siang hrih lo ih an president thattu cu an zingzoi rero lai, palik bawi telin minung 23 an kai zo.

Haiti ram hi an farah rualrual in an ram khal a buai zet, tapung pawlkom khal an tam. President Jovenel Moise ngaihlotu pawlkom khal an um ih lamzawhnak an nei ṭheu.

Be the first to comment

Leave a Reply

Your email address will not be published.


*