Hakha Ih An Kaihmi (15) Cu Ralhrang Pawlin Kalaymyo Thawnginn Ah Ret Dingin An Phur, Lamlak Ah An Kapaw

Ralhrang pawlin Hakha ih an kaihmi (15) cu Kalaymyo thawnginn ah khum dingin an phur ih lamlak ah tualsung mipi ralkap pawlin an kap. Ralhrang motor cu 27 a si ih tank pahnih a tel. May 3, 2022 ah Dokthek khua kiangah tualsung mipi ralkap pawlin an rak kap.

CDF ralkap in, “Ruah a sur ruangah ralhrang pawl cu hmun pakhat ah an umkhawm, culai ah kan kap ih ralhrang 13 cu an thi ding” a ti. Dokthek khuami in, “Ralkap motor ara ti kan theih ruangah khua kan suahsan lawk. Mizan ah meithal awn kan thei, an kapaw ti kan thei. Tutiang khuasung ah ka lut hrih lo” a ti.

May 2, 2022 ah ralhrang pawlin an kaihmi (15) cu Hakha ihsin Kalaymyo thawnginn ih ret dingin an phur. An kaihmi pawl cu pukmah 505 ih thubuai orh le thuhla dangdang ruangih an kaihmi pawl an si.

An kaihmi pakhat ih sungkhat in, “May 2 ah an hruaisuak. An hruai ding ti khal kan thei cia lo, a zing lawngah kan thei fang ih kan hmu ngah lo” a ti. May 4 zinglam ah Ramthlo khua kiangah ralhrang le tualsung mipi ralkap pawl an kapaw ih ralhrang pawlin khuasung inn 9 an urkang.

Be the first to comment

Leave a Reply

Your email address will not be published.


*