Hanna Yuri In “Myanmar Ramsung Ih Thilthleng Cu Tlangpar Mi Pawlin Kum 70 Lenglo Kan Rak Tuar Zo” A Ti, Mindat Hrang Bawmnak A Pe

Kum 28 mi Hanna Yuri cu Myanmar model, actress le makeup artist hminthang zet a si. Myanmar, Taunggyi khua suak a si ih Thailand ramah makeup a zirsuak ih a hlawhtling zet.

Tu’ah South Korea ram ah hnaṭuan in aum ih Myanmar mipi pawl hrangah a theitawk in a cangvai rero lai, a facebook cahmai khalah Myanmar ramsung buainak thuhla le mipi pawl ih harsartnak cu a ausuak ringring.

Korea thuthang picang Kyunghyang Shinmun (경향신문) thawn hmaiton thusutnak an nei ih Myanamr ramsung buainak cu cipciar zetin a sim, an interview-nak cu part-1 le part-2 in an tuah ih part 2-nak ah Mindat thuhla cipciar zetin a sim thu a rel. Part-1 nak lawng an suah lai ih neta ah part-2 nak an suah ding.

Hanna Yuri in “Ralkap in thuneihnak an lak hnu ihsin mipi pawl an that, mipi inn le lo an siatsuah ih an duhduh mipi thilri pawl an lonsak. 2021 kum, Myanmar ramsung ih ralkap pawl cangvaihdan cu tlangpar mi pawlin kum 70 lenglo kan rak tuar rero zo mi a si.

Mipi an that ih harsatnak an pe, an cangvaihdan pawl cu Kachin, Chin, Kayah, Rakhine, Shan le tlangpar mi pawlin khuahlan lai ihsin kan rak tuar rero zo. Kan pilepu pawl ih an rak tuar rero mi hlir a si…” tin mirang ṭongin a sim.

Hanna Yuri in “Ramdang pawl hrangah coffee khuatkhat man cu zianghman a si lo, asinan Myanmar mipi ṭhenkhat hrangah cun nikhat rawlei man a si” tin Myanmar mipi pawl hrang bawmnak a dilsak.

Korean mipi pawlin bawmnak sumpai an pe ih Myanmar mipi pawl hnenah a kuat zo, a hlawhsuah hmaisabik Korea sumpai Won ting 1 khal Chinram, Mindat raltlan pawl hnenah a hlu thu theih a si.

Be the first to comment

Leave a Reply

Your email address will not be published.


*