HCMF In Christmas Le Kumthar Puai Tuah Lo Dingin Theihternak An Suah

Hakha ramsung ah tuikum 2021 Christmas le Kumthar Puai tuah lo dingin Hakha Christian Minister’s Fellowship in theihternak ca an suah. Christmas boruak ah kum dang vekin khuasung lamzin, biakinn pawl cei lo ding, biakinn sunglam malte le signboard malte lawng timtuah ding.

Inn khal lenglam cei loin innsung lam lawng cei dingin forhfialnak an tuah. “Kan unau pawl ih inn urkang a si ih ramlakah tih thlaphang an um, culaiah Christmas puai hlunghlai zet ih rak hmang ding cu a cang thei lo” tin tuanvo neitu in a rel.

Miburpi umkhawm in Christmas puai tuah lo ding, miburpi in ruaithehnak nei lo ding, hmun dangdang ihsin Christmas puai sawmnak aum pang asikhallen pastor pawlin va telpi lo ding. Sweet December le Kumthar puai hngaknak le sevice khal tuah lo dingin an tarlang.

Ralhrang pawlin Thantlang khua an urkang ih mipi cu tih thlaphang in hmun dangdang ah an tlan thluh, culai ah hlunghlai zetin puai rak tuah cu a cang thei lo tin tuikum Christmas le Kumthar puai cu tuah hrih lo dingin HCMF in ca an suah.

November 22, 2021 khalah International Myanmar Baptist Fellowship in kan rampi boruak a tha lo ruangah tuikum Christmas puai cu kumdang vekin kan hmang thei lo ding. Christmas puai tuahnak ding hrang sumpai cu mipi kilhimtu le raltlan pawl hrangah hlu dingin sawmnak ca an suah.

Be the first to comment

Leave a Reply

Your email address will not be published.


*