Hel Pawlin An Kai Ih Pathian Hnenah Thutiam Kamawknak A Tuah Hnuah A Tlansuak >>>

Nigeria ram hi leitlun ih Christian hmuhsuamnak ram pakhat a si, tleirawl tete an kaihmi pawl cu an pawngsual ṭheu. April 14, 2014 kum ih thilthleng a si ih hi thil tongtu in November 16, 2021 ah International Christian Concern’s 2021 Persecutor of the Year Awards ah mipi hmaiah a thilton cu a relsuak.

Tleirawl Joy Bishara cu tlawngkai in a rualpi pawl thawn tlawnginn sungah an riak. Hel pawlkom Boko Haram in an khua hi an va sim ih an inn le lo pawl an urkang, tlawnginn sungih um tleirawl pawl cu an kai thluh. Khuasung mi ṭhenkhat le Joy Bishara ih nulepa cu an rak tlansuak man.

Himi ṭum ah hel pawlin tleirawl 276 an kai ih ṭhenkhat cu an thuhla theih a si nawn lo. Hel pawlin “Thil pakhat khat nan tuah tum asilen nan thi ding” tin an hringhro ih an tlawnginn cu an urkang. Motor truck pathum an keng ih nunau pawl cu “Nungdam duh zaten motor parah kai uh” an ti, Joy Bishara le a rualpi pawl khal motor parah an kai.

Hel pawlin an phur vivo ih motor parah Joy Bishara in, “Bawipa, zangfahten kan innsang pawl in hmuhter sal aw. Ka tlansuak thei asilen ka damsung na rawng ka bawl ding” tin thla a cam. Cumi hnu minute 5 hrawngah an motor cu a siat ih ramlak lamzin ah an cawl, an thlennak hmun hi khua thawn a hlaaw ruangah hel pawlin motor dang ruk ding an thei lo. Curuangah an motor sia cu tuahṭha dingin an zuam rero, ṭhenkhat in kiangkap khua ih motor tuahthiam an va ko.

Joy Bishara in, “Hitin an buai rero laiah “Dawp aw” tin fialtu ṭongkam ka thei, motor hnuailam ka vun zoh ih ka ṭih tuk. Ṭongkam pakhat in ‘Na dawp asilne na thi ding’ in ti, pakhat in len ‘Dawp aw’ in tiih ka thinlung cu a buai tuk. Asinan ka dawp ih ka thi asikhallen ka nulepa in ka ruak an ra hmu dingih an tuar a ziaum ding, in hmu nawn lo asilen nitinten thinhar magbang in an um ringring ding tin ka ruat ih ka dawp thutthi.

Leihnuai ka thleng hnuah ka thi lo ti ka theiaw ih ka tlan ciamco hngal, lo hnaṭuan pakhat in in rak hmu ih in thup. Cutin hel kutsung ihsin ka tlansuak” a ti. A tlansuah hnu reilote ah US ram a thleng ih Canyonville Christian Academy ah buaih a ngah ih rawngbawlnak ah a tel. 2017 kum ah US president hlun Donald Trump thawn White House ah an tongaw.

Be the first to comment

Leave a Reply

Your email address will not be published.


*