Himi Ihkhan Sungah Rawngbawltu Nunau 2 Cu Rapthlak Zetin An That

Zuk kan tarlang mi ihkhan hi Kachin san thuanthu sungah a cam ringring ding. Kachin mipi pawlin himi ihkhan sung an hmuh tinten an mitthli a luang. January 19, 2015 kum ah Kachin Christian rawngbawltu fala 2 cu himi ihkhan sungah rapthlak zetin that an si, pawngsual an si hnuah an hrem that.

Tuisun January 19, 2022 hi an thihcam kum 6 kimnak a si ih Kachin, Myitkyina khawpi ah sunnak le thlacamnak an nei. Tuini tiang rawngbawltu 2 pawngsualtu le thattu hi an kai ngah hrih lo cu an diriam thei lo.

Kachin Baptist Church (KBC) ih rawngbawltu fala kum 20 le 21 mi Sayama Maran Lu Ra le Sayama Tangbau Khawn Nan Tsin cu Shan State, Muse District, Kaungkha khua ah rawngbawl dingin an poksuak. Alakin nauhak pawl hnenah ca an zirh, cutin rawngbawl ih an um lai January 19, 2015 zan ah misual in an lutchilh ih an pawngsual hnuah an that.

Sayama pahnih an thih zan ah an khua kiangah ralhrang LIB 503th tatzin pawl umhmun an khuar ruangah kiangkap um pawlin ralhrang kuttuar si an zum.

Kachin Nunau Pawlkom in het leh chet tin zingzoinak an tuah nan tuini tiang tualthattu hi an kai ngah thei hrih lo. Sayama Tangbau Khawn Nan Tsin ih nu in, “Ziangtlukin caan rei khalsehla thudik a langsuah ding caan ka hngak ringring lai” a ti.

Kaungkha khua kiangih umhmun khuar ralhrang 28 hnenah zingzoinak an tuah, an mipa tii le an sam pawl an la ih sibawi in zohdiknak an nei nan tuini tiang an thuhla dang theih bet a si nawn lo. 2018 kum ah ralbawi Min Aung Hlaing in rawngbawltu sayama 2 cu ralkap pawl ih pawngsual le that mi an si lo tin a phuang.

Himi thuhla ah January 19, 2022 ah media picang in ralhrang aiawh ih thuphuangtu Zaw Min Tun hnenah thu an sut ih Zaw Min Tun in, “Himi thil arak thleng laiah, an khua kiangih um ralkap pawl cu zingzoinak kan tuah thluh zo ih ralkap pawl ih thiltuah a si lo ti kan thei.

Khuami pahnih ih thiltuah a si ti kan thei, khuami pahnih cu KIA hnenah an tlanlut zo, KIA hnenah sualtuahtu pahnih cu kan dil nan tuini tiang in pe hrih lo” arak ti. Media picang in Zaw Min Tun ih thurelmi cu dum vivo in KIA pawl an pehtlaih tum rero lai. į¹¬uanvo neitu pakhat in, “Himi thilsual tuahtu cu an thei hrih lo, asinan thudik cu Kachin mipi lawng siloin, Myanmar mipi zaten’n kan thei thluh” a ti.

Be the first to comment

Leave a Reply

Your email address will not be published.


*