Hmuhsuam A Tong Ṭheu Ruangah Sui Mit A Nei

England, Liverpool khawpi ih um fala kum 25 mi Danni cu thla 6 mi a si laiah mit cancer anei, siibawi pawlin a mit pakhat an hlonsak. Mit lem a bun ṭheu ih tlawngkainak ah an hmuhsuam thei zet, a mit lem bunmi cu mipa milem a si.

Tlawnginn sungah a mit lem hi a tla pang ding a phang ruangah a lasuak ṭheu ih amahten a bun thiam nawn lo, an sayama khalin a bun thei lo ruangah a innsang le a nu ih an hmuah ding caan a hngak ṭheu. A mit khatlam cu a sam in a khuh ringring.

A nu le an innsang pawl an va thleng tikah a mit lem cu an bunsak, tlawngta nauhak pawlin milem a bun ruangah an hmuhsuam thei zet. A upat hnuah leknak, zuhmun ah hna a ṭuan ih mikhual pawlin a mit lem ruangah an hmuhsuam.

Mikhual pakhat in £20 a pe ih na mit thi kha va tuah ṭha aw a ti cu a ningnaa tuk. Thlalang khalah a zoh aw thiṭha ngam lo. 2021 kum ah amah vekih damlonak nei mi pakhat thawn an tong aw ih milem a bun ve lo, a mit khatlam an hlon ve.

Cumi an tonawk hnu ihsin huaisennak a nei thok ih mit lem bun lo khalin a vaksuak ngam, tu’ahcun cozah hna a ṭuan zo ih a mit ah sui mit a bun. Danni in, “Hmuhsuam ka tong ṭheu ruangah mah le mah rinsan awknak ka rak nei dah lo.

Ka mit ruangah hmuhsuam ka tong ṭheu, ka mit khatlam hi rak hlon lo sehla cun tuini ah ka um nawn lo ding. Ka mit khatlam an hlon ruangah ka nungdam lai ih poi ka ti lo, nan dinhmun ah lungawi hna thiam uh. Ka mit lem khal ka bun nawn lo ih sui mit sawn ka bun zo. Mah le mah rinsan awknak ka nei zo, thlalang ih ka zohawk tik khalah ka hnangam tuk” a ti.