‘Hnam’ (Lubul) Thuhla

Asian ramsung ah ‘hnam’, nunau lubul thuhla hi a lar zet. Buddhist sakhuanak ahcun an uar cuang. Thailand, Cambodia le Indonesia ramsung ahcun an hmu rero lai.

Hlanlai kan pilepu pawl khalin ‘hnam’ thuanthu tam zet an rak nei ve. Hnam cu nunau lubul a si, zanṭim laiah a zamsuak ṭheu ih rawl a hawl. Zing ni suah hlanah a taksa thawn a bun aw sal ṭheu. Thailand pawl cun “Krasue” tin an ko ih camsiat mi nunau an ti. Zing ni suah hlan ah a taksa thawn a bun aw man lo asilen naa tuar in a kangral thluh.

Zanṭim laiah rawl a hawl ih a hmu lo asilen ek a ei ṭheu. Innvulh rannung ar, mee le uico pawl a ei ṭheu ih an thisen a in, an sungril pawl a ei thluh. Naute khal a ei ih mithi ruak, rimsia zo hi thaw zetin a ei. Hnam an hmuhdan cu a zam thei ih a eng thei. Pum sungih um naute hi a ngaina cuang. Hnam cu nunau hmalṭha zet a si.

Thailand thuanthu pakhat ah ‘Hlanlai ah siangpahrang hminthang zet arak um, a nupi Khmer cu a hmelṭha tuk. A nupi le a ralbawi cu an rak duh aw ih a uire. Siangpahrang in a theih veten a thinheng tuk ih a ralbawi cu a lu an sat tan, a nupi khal a nunglai in an urkang.

A thih hlante thu a sam ta ih a taksa cu camsiat a si, minung ah a piangsal ih hnam ah a cang an ti. July 22, 2008 khalah Thailand, Pathum Thani Province khua te pakhat ah hnam an hmu ṭheu. An rannung pawl khal a hlo ringring, zanṭim laiah thil eng zamkual rero an hmu.

An khuapawn ah putar pakhat amah lawngin a khuasa. Cumi pitar cu an rinhlel zet, a thih hnu ihsin an khua ah hnam an hmu nawn lo. September 13, 2016 khalah Thailand, Ayutthaya Province khua ih um innsang nu pakhat in hnam a hmu.

Zan nazi 9:30 hrawngah TV a zoh ih nikhua a sia, an uico a bo ciamco ih innleng ah ava suak nan zianghman a hmu lo. An innkawt ih an ret mi CCTV a zoh cu an sangka te ihsin hnam in arak zoh ringring lai a hmu ih a ṭih tuk ah a au ciamco.

Hnam cu an hmuanchar thingkung lakah a zamlut ih a hlo. Hnam hi camsiat mi nunau an ti, ṭhenkhat in nunau uire, tualthat nunau pawl cu an thi ih an piangsal asilen hnam ah an cang ṭheu an ti. Ṭhenkhat in hnam cu khuasia, khuavang an si” an ti.

Be the first to comment

Leave a Reply

Your email address will not be published.


*