Hnaset Pitar Cu A Fapa Le A Nupi (A Mo) In An Hlon

Myanmar ram cu Covid-19 natsia le thuneihnak latu ralkap pawlin an nuai ciamco ruangah innsang tin ah harsatnak a thleng. Sumpai ah harsatnak a thleng ruangah innsungsang ah buainak a suak ih thil rapthlak zetzet an tuah.

July 21 zanlam nazi 4:00 hrawngah Bago Division, Thayar Aye khuapawn ih lamzin kap thlamte ah pitar pakhat cu a fapa le a nupi in an va hlon. Motor var in an cawl ih motor mawngtu cu a fapa ti a si. Pitar cu amahten ihphah khal a tuah thei lo.

A fapa ih nupi in a ei le in ding, a sinfen hnipuan pawl cu bawmte in a thiarsak lai cu kiangkap ih um pacang pakhat in arak um. Motor sungah a tule pawl khal an to, cutin thlamte ih an ret hnu ah “Kan ra lo hruai sal ding” tin an tlansan.

Khuathim hnu khalah an ra kirsal nawn lo ruangah pitar cu a thinhar tuk. Lamzin ih feh pawlin thu an va sutfiah ih a hnaset ruangah ringpin an biak a ṭul, a fale pawlin an hruaisal tum nawn lo ti a theih ruangah a mithmai ah riahsiatnak a lang ih lungzuur in a ṭap.

Kum 80 mi a si ih a hmin cu Daw Yin Hlaing a si, a fapa ih hmin cu Ko Win Naing le a fapa ih nupi hmin cu Ma Momo tin a sim hai. Mawlamyine khua ih um an si thu khal a sim thei.

Mithmutu in “Mawlamyine ih um pawl rak zingzoi hram uh, pitar ih zuk hi tarlang ci a si lo ti cu ka thei ko nan ka run tarlang thotho. Tuvek boruak sia lakah pitar kum 80 mi, amah lawng lamzin kap ih hlon ding a si lo. Nan cawm thei lo asikhallen pitar putar umnak runinn ah ret ding nan si” tin a tarlang.

Be the first to comment

Leave a Reply

Your email address will not be published.


*