Hotel Hmaiah Mak Zetin A Ding Ringring Hnuah Hotel Tidai Retnak Tank Sungah A Ruak An Hmu

Mexican fala kum 18 mi Debanhi cu Nueva Castilla Motel kiangkap ah mak zetin a ding ringring, a feh phah. Cumi hnuah amahten hotel sungah ava lut ih a hlo. Zarhhnih sung mihlo tin an hawl rero hnuah hotel innpar ih an tidai retnak tank sungah a ruak an hmu.

Mikhual pawlin tidai rimsia an ti hnuah tank sungih tidai cu an hmang nawn lo. Tank sung an vun zoh cu mithi ruak an hmu, mihlo tin an hawl rero mi a si ti an thei ih palik hnenah an sim thei. April 8 zan ah a rualpi nunau pahnih thawn party-nak hmun ah an va feh ih cutawk ah nunau pakhat thawn an kawk’aw ruangah motor sang in a tlung.

Motor mawngtu cu Juan David a si. Hotel kawt an thlen tikah a tum duh thu a sim ih motor ihsin a suak, cutin lamzin ih a ding ringring lai cu motor mawngtu in a zuk ih a rualpi pahnih hnenah ‘Hitawk hmun ah a ṭum’ tin tettikhannak ah a zuk cu a kuat.

CCTV ih an zohsal ti khalah amahten motor sung ihsin a suak ih lamzin ah a ding ringring hnuah amahten hotel sungih a lut lai cu an hmu. Hringtu a pa in motor mawngtu in a pawhte a thamsak tum ruangah motor ihsin a tum tin CCTV an zohnak ihsin palik hnenah a sim thei.

Palik pawlin motor mawngtu cu rinhlel thu in an kai lawk ih a thuhla an zingzoi vivo hnuah Debanhi ih thihnak ah pehtlaihnak zianghman a nei lo tin an suahsal. Debanhi ih ruak an hmuh tikah a lu ah hliamhma a tuar, ziangtin a thi, zo in an that, ziangtin tidai retnak tank sungah a lut thei ti cu an thei hrih lo ih an zingzoi rero lai.

Hringtu a pa in, “Damten kan hmusal dingah kan ruat nan a ruak lawng kan hmu. Ka nupi thawn kan tuar a naa tuk, khatlam ahcun a ruak te tal kan hmusal ruangah kan tuar hi a ziaum deuh. A ruak vui ding kan nei ih kan ṭah thei, a thlan ah pangpar kan ret thei. Mi tampi cu ruak hmu nawn lo ih hlo lanta an um” a ti.

Be the first to comment

Leave a Reply

Your email address will not be published.


*