Hpakan Leimin Ah Mi 100 Lenglo An Hlo

December 22, 2021 zinglam ah Hpakan, Thayar khua ih lungmankhung hawlnak hmunpi ah lei a min ih kiangkap um mi 100 lenglo cu an thuhla theih ding um loin an hlo, an thi maw an nungdam ti khal theih a si hrih lo.

Mihlo pawl cu leiminnak hnuai tiva ih lungmankhung rak hawl rero lai le kiangkap ih thilzuar pawl an si. Runsuaktu in, “Tuizing ah lei a min ih minung 100 hrawng a nen an ti. Tu hi va feh dingin kan buai rero lai” a ti.

Tu’ahcun runsuaktu pawlin mihlo pawl hi an hawl rero laitak a si. Hpakan ah lungmankhung hawl an siang lo nan khuasung mipi pawl cu lungmankhung hawl hi an pumcawmnak a si ruangah tiva ah lungmankhung hawlin an poksuak ṭheu.

December 19 khalah Sai Ja Bum khua kiangih lungmankhung hawlnak hmun ah lei a min ih hnaṭuantu 10 hrawng an hlo. 2020 kum ah Hpakan, Wekha khua ih lungmankhung hawlnak hmunpi ah rapthlak zetin lei a min ih hnaṭuantu le motor mawng pawl telin mi 160 lenglo an thi ih hliamtuar 70 an um.

Be the first to comment

Leave a Reply

Your email address will not be published.


*