Hpakan Leimin Ah Mi Tampi An Hlo, Ruak Pakhat Lawng An Hmu Thei Lai

December 22, 2021 zinglam ah Hpakan, Thayar khua ih lungmankhung hawlnak hmunpi ah lei a min ih kiangkap um mi tampi an hlo, an thi maw an nungdam ti khal theih a si hrih lo. Zinglam nazi 9:00 hrawng ihsin mibawmtu pawlkom dangdang in an hawl thok.

Sunnivu in an hawl rero nan simlam nazi 4:00 tiang ah mithi ruak pakhat lawng an hmu, ti a thuk ih tidai sung a nawi tuk ruangah mibawmtu pawl khal mihlo hawlnak ah an buai zet. Mibawmtu pakhat in, “Tuisun ah ruak pakhat lawng kan hmu. Zinglam ah kan hmu, zanlam tiang kan hawl rero nan a dang kan hmu nawn lo. Tuisun hrang cu kan cawl lawk ding, thaizing ah kan hawlsal ding” a ti.

Ahlan vekin mihlo cazin ngankhumtu an um lo ruangah minung paziat ciahciah an hlo ti hi an rel thei hrih lo. Ṭuanvo neitu in, “Tutiang ah mihlo cazin hi felfaiten kan theithei hrih lo, khua lal pawl khalin mihlo cazin an ngankhum thei hrih lo. Kiangkap ah sungkhat mihlo hawltu pawl an tam zet, mihlo hawltu innsang pawl hi 30/40 hawl an si ding” a ti.

Lei a min laiah a hnuai tiva sungah hnaṭuantu 80 kiangkap hrawng an um tin kiangkap um pawlin an rel. Hpakan ah lungmankhung hawl an siang lo nan khuasung mipi pawl cu lungmankhung hawl hi an pumcawmnak a si ruangah tiva ah lungmankhung hawlin an poksuak ṭheu.

December 19 khalah Sai Ja Bum khua kiangih lungmankhung hawlnak hmun ah lei a min ih hnaṭuantu 10 hrawng an hlo. 2020 kum ah Hpakan, Wekha khua ih lungmankhung hawlnak hmunpi ah rapthlak zetin lei a min ih hnaṭuantu le motor mawng pawl telin mi 160 lenglo an thi ih hliamtuar 70 an um.

Be the first to comment

Leave a Reply

Your email address will not be published.


*