Hramlak Ihsin Ca Kuat…

“Maw duhdawt mi u le nau pawl nan hnenah thusim duhmi kan nei. Hivek ih ram buai kan rak si tikah cun mai ram le miphun hrang ah tiin a ṭha bik ruat in kan nunnak kan pe a si. “Zalen Lairam” kan ramte ahhin ṭih ding um lo ih (kan hmu banlo asikhalle) kan u le nau rual le pi pawl nun nuam zet ih an sunmang le tumtahmi hlawhtling zet ih hmang ih santhar naulepawl khalin zalen zet ih an um theinak ding ram neih hi kan saduhthah cu a si.

Mai hrang lawng ih uknak sual, dotu kan si fawn lo, kan ram le miphun hrangah kan thawk neta bik tiang petu ding kan si sawn. Kan duhdawt zet mi kan ram, kan nu le pa, u le nau, rual le pi hrang ah a si. Duhnak thinlung lawngin ral do a ngah fawn lo. Mipa nunau ti um loin kan ram le miphun duhdawtnak cun in fingkhawm ih hramlak ah a umum eitlang dingin raldo zir in kan pok cio.

Training sung hi a har zet, thi le thau tiang suak ih bansan duhnak thinlung tla vawi tampi aum. Kan ihnak cu thing pheng (zan a vun si ahhi cun maw Siangpahrang ih ihkhun hnak ih kan hril sawn). Kan lukham cu kan kawr (a bal deuh lak ihsin a fai deuh mi), a dai leh hlum karlakah kawng sang keu rero tuar hman ningla thin diriamnak cu kan laksawng, zalennak thinlung cu beiseinak tumtak in neihter tu a si (Nikhat nini ahcun thuanthu an cang thluh zik si khaw. Ka rual kan har can hi rel tlang thei sal kan si kei maw.)

Kannih cun kan taksa hrisel bik ding ih zuam le hriamhrei thiam zet ih hmang ding ih zir hi kan tum awk thei mi a si. (Sum le pai, meithal, ei le in ding tumaw cop thei kan si fawn lo). Maw duhdawt mi pawl nan rawl pek mi ringin ril rawng tihal loten kan nung, nan silh le fen pek mi in a saa, a dai kan tuar thei, si le vai in kuat mi ei-in damcak zetin kan um.

Har caan ah thazang kan ngaknak bik cu nanmah nan si, Camp ih riak ih ummi pawl vial hi kan silo kan dung ihsin in bawmtu hmuntin ramtin ah kan u le nau nan um ti kan thei ring ring. Asinan khuk bil in kan lo dil hai, kan do mi ral hi neh thei dingin kan minung cahnak hi mal deuh hmansehla Pathian nung neitu kan si. “Thlacam bang hlah uh”, Pathian ih lamhruainak thawn in kan ram hi kan la kirsal ding. Nan tuah nan tuan suah mi ih in bawmnak pawl hi alak a si hrimhrim lo ding. Rak tang hrih uh si khua avang cing ding “Zalen Lairam”. (#Victor Vldt)

Be the first to comment

Leave a Reply

Your email address will not be published.


*