Hringtu A Nu A Vuak That

Shan State, Kengtung Township, Hwe Lon khua ih um tlangval pakhat in amah hringtu a nu cu phahlai in a vuak that ih a ruak cu ramlakah ava phum tum. November 17, 2021 sun ah kum 54 mi Daw Mi Ju le a fapa cu ṭongkam an el’aw ciamco tin innhnen pawlin an rel.

Tualsung mi pakhat in, “A fapa hi ritheihsii ngawlvei a si. A tir ahcun a nu thawn ṭongkam an el’aw ciamco ih Daw Mi Ju cu innleng ah a suak tin innhnen pawlin an rel. Cumi hnuah Daw Mi Ju ih ruak cu lolak ah an hmu” a ti.

Khuasung mipi pawlin palik an ko ih an zingzoi hnuah tualthattu cu a fapa a si ti an thei. Thuhla theitu in, “A tir ahcun ziangtin a thi ti kan thei lo, hliamhma a tuar ruangah mi kuttuar in a thi an ti. Palik pawl an ra thleng ih a fapa cu thu an sut ih a nu a that thu a phuangaw” a ti.

Daw Mi Ju ih bawb le hnakhang ah phahlai ih vuaknak hliamhma aum, a hnar le a ka ihsin thisen a suak. Ralkap in Myanmar ramsung thuneihnak an lak hnu ihsin Kengtung ramsung ah ritheihsii tham an tam zet, Hwe Lon khua cu ritheihsii zuarnak market vek a si ih ṭuanvo neitu pawl khalin an control thei lo.

Tualsung mi pakhat in, “Tualthatnak bik cu ritheihsii ruangah a si. Ritheihsii ruangah fapa in nulepa a that, pasal in nupi a that. Sia le ṭha an theihnak khal a hlo thluh, ṭuanvo neitu pawlin ritheihsii hi cinfel lohli hram uh” a ti.

Be the first to comment

Leave a Reply

Your email address will not be published.


*