Hringtu A Nu Pawngsualtu, Thattu, A Lu Tantu Mipa Cu Rualpi Ṭha Ah Ava Tuah

Kum 24 mi Jennifer cu hngakṭah runinn ih thanglian a si ih a upat hnuah hringtu a nu a hawl, arak umnak Children’s Home Society of New Jersey ah ava feh ih a nui thuhla cu a zingzoi.

Hringtu a nu cu hlawhhlang a si ih December 2, 1979 zan ah misual hminthang an timi Richard Cottingham in a that thu a theisuak. Nunau pakhat thawn Hotel room sungah a that, an lu a tanbul ih an kut khal a tan. Tuini tiang an lu hi an hmu nawn lo, cun a nui ruak kiangih um nunau pakhat ih ruak cu zo a si ti tuini tiang an theithei hrih lo.

Richard hi misual hminthang a si nan tualsung palik pawlin an kai thei dah lo, vei tampi cu zuri, motor mawngdan diklo tivekin an kai nan an suahsal ṭheu. Mifel le miṭha zet vekin a lang ruangah zohman in misual a si ding ti hi an zum lo, a nupi thawn an ṭhenaw zo ih a nupi cun a thluak lam fehdan a diklo a ti.

Nunau a pawngsual ih a that ṭheu, tulai vekin zingzoinak ṭha, CCTV tivek arak um hrih lo ruangah tualsung palik pawlin an kai lohli thei lo. May 22, 1980 zan ah fala pakhat a lei ih hotel sungah an riak, that dingin a puahcok rero laiah fala cu a tlansuak thei ih hotel hnaṭuantu pawl hnenah a thilton cu a sim thei.

Cutin hotel hnaṭuantu pawlin palik pawl an ko lohli ih an kai ngah, a sulhnu pawl an zingzoi tikah minung 11 a that zo ti official in an phuang. Amah cun mi 85 maw 100 hrawng a that thu a phuangaw nan a thatmi pawl ih thuhla cu a cipciar in an theithei hrih lo. A thatmi pawl cu an lu a tan, an kut le ke a tan ih an sungril pawl a urkang ṭheu.

Ṭhenkhat cu an pawhte a tansak ih an hmai ah a ret, an lu a tanbulmi pawl cu tuini tiang an hmu thei nawn lo. Ṭhenkhat a thatmi ruak cu tuini tiang zo an si ti khal an theithei lo, palik pawlin an kaih hnuah nunau tam zetin anmah pawngsualtu a si thu an ra phuangaw supso ih thubuai tampi an orhter.

Ziangruangah hitin hlawhhlawng pawl a that ṭheu ti cu a phuangaw duh lo ih an zingzoi rero lai, nunau a hremmi pakhat in, “Nasa zetin in hrem, ka pawhte hmur khal a keutan zikte. Mihlothlau nu! hlawhhlang na si ruangah na sual man cu na tuar ding. Midang khal an tuar rero zo’ tin in hringhro rero” tin palik hnenah a phuangaw.

Jennifer in a nu thattu cu palik pawlin an kai zo ti a theih ruangah aumnak thawnginn sungah ava feh ṭheu ih ṭha zetin a pehtlaih, an tongawk ringring hnuah rualpi ṭha ah an cang ih an capoh aw ṭheu. Kum 75 kim zo Cottingham khalin rualpi ṭha vekin arak pehtlaih ve.

Jennifer in, “Ka thinlung ka ti kau ih nel’um zetin ka va tong ṭheu, a hrangah zalennak ka pe. Hitin ka va pehtlaihnak cu ka nu ruangah a si, ziangruangah ka nu a that ti hi theihsuah tengteng ka tum rero lai. A thatmi nunau pawl hrang le ka nu hrangah tualthattu cu rualpi ṭha ah ka va tuah. A thilsuah tuahmi pawl khal in sim rero zo, thubuai 75 cu kan haisuak thei zo ih ka nu a thatnak san hi theifiang ka tum. Ka nu thawn kum 2 lai an theiaw zo thu tla in sim thei, ka zingzoi suak hlanlo cu ka buapi vivo ding” a ti.

Be the first to comment

Leave a Reply

Your email address will not be published.


*