Hringtu Pai Ruak An Thiar Lai Cu Thinhar Zetin An Rak Zoh Ringring, Umnak Ding Inn An Nei Nawn Lo

Sagaing, Yinmabin District, Pale khua ih um unau thum te in hringtu nu an nei nawn lo, a pa lawngin a hmeipi hai. An unau thum in an nauhak zet lai ih hringtu an pa cu an ziangkim a si, an hnagamnak umsun khal a si.

Asinan, Covid-19 in a damlo ih zianghman a ṭuan thei nawn lo ruangah an buai zet. A fapa upabik mipa in pacan a cuh ih hna a ṭuan hnuah a pa damlo cu an tuamhlawm, asinan ṭhah lam a pan thei cuang lo ih July 19 ah a thi.

Cutin Pale Meimit Pawlkom in a ruak cu an va la, a fale 3 ih mithmai ah thinharnak mitthli a luang ih hringtu pai ruak an thiar lai cu an sangkate ihsin an rak thlir ringring.

Pale Meimittu pakhat in a lainat tuk ruangah arak zuk ih July 20 zing ah “An thuhla ka ruat ruangah zan khal ka itthat thei lo, ziangtin ka bawm thei ding ti ka ruat rero. Sangkate ihsin an rung zoh lai cu ka thinlung sungah an cam ringring” a ti.

An unau thum in quarantine-nak hmun ah an um zo, Pale meimittu in an thuhla a tarlang nak zarah nauhak pawl bawm dingin mi ṭhenkhat ke an kar suak zo ih quarantine-nak ihsin an suak veten umnak ding inn te an nei thlang ding.

Be the first to comment

Leave a Reply

Your email address will not be published.


*