Htet Htet Moe Oo In, “Nulepa Thu Ka Lung Ruangah Hmuhsuamnak Ka Tong Cu Ka Diriam Ko” A Ti

Kum 50 mi nuthlawi Htet Htet Moe Oo hi a vanglai ahcun theilotu an um zik lo, Myanmar lemcan thiam hminthang zet arak si. Tuiṭum ramsung buainak ahcun soisel a tong tam zet, ramsung a buai rero laiah online parah sui le ngun zuar in arak um ruangah soiseltu khal an um. A nung thuhla lam cu kan tarlang tam lo men ding.

Htet Htet Moe Oo in, “Kum 10 liamzo ah tuvek thlatang khuasik caan ah meisa kiangah ka pa in nun in rak sim. Ka pa hi aum nawn lo nan thu in rak simmi pawl cu ka nung ah an nung ringring lai. Ka pa in ‘Mi veikhat na bum asilen thudik hi na theithiam nawn lo dingih na bum vivo duh ding. A rei vivo kei thudik cu thudik lo ah na ruat sawn ding.

Minung cu bum a theih nan duhdawtnak cu bum a theih ve lo. Duhdawtnak hi na bum asilen duhdawtnak khaazet na tong ding. Na ei hrih lo mi cu ka ei zo ti hlah, na thlen hrihlonak hmun cu ka thlen zo ti hlah. Na theih lo mi cu ka thei ti aw hlah, na neih lo mi cu ka nei ti hlah.

Thudik cu thaw zetin relsuak sawn aw, thildiklo mi an lo pek asilen la aw hlah. Midang ih thil neihmi thik aw hlah tin nun in rak sim, ka pa hi buaih ngahmi a si lo nan hitin nung in rak sim ṭheu. Ka pai nunsimmi vekin ka um ruangah a caan ahcun bum ka tong, hmuhsuamnak ka tong ṭheu.

Asinan ka diriam ko, nulepa thulung lo ih thildiklo tuah aiin nulepa thulung ruangah harsatnak tong hi a sunglawi sawn, lungawi zetin ka cohlang. Hringnun ah kan ṭap ringring lo ding, kan ṭah hnuah kan lungawi sal ding. A thupibik mi cu thanau, beidong lo ding hi a si” tin a tarlang.

Be the first to comment

Leave a Reply

Your email address will not be published.


*