Htun Eaindra Bo Soiseltu A Nei Tam, Thengre Vuak Tlak Mi Bangin A Rep Khepkhep

Kum 55 mi Htun Aeindra Bo cu Myanmar lemcan thiam le hlasakthiam hminthang a si, Academy Award laksawng hi veithum rori a ngah zo. An innsang hi an lian zet ih sui le ngun zuarnak company khal tampi an nei, Aung Minn Tun thawn an neiaw ih fapa pakhat an nei.

Mi hminthang pakhat a si ih Myanmar ramsung buainak ah a rep khepkhep ruangah soiseltu a nei tam zet, ralkap lamtang ti khalin an soisel. Htun Aeindra Bo in u mipa pakhat le naunu pakhat anei, a naunu cu Thet Thet Khine a si.

Thet Thet Khine khal Myanmar ramsung ih mi hminthang pakhat a si. Tu’ah ralkap pawlin Minister of Social Welfare, Relief and Resettlement an ṭuanter ruangah mipi in an soisel zet ih an sui le ngun zuar mi khal phitsak thluh dingin an au rero.

Htun Aeindra Bo khal a naunu dungthlun in a feh vivo tin an soisel, Thet Thet Khine cu NLD party arak si lawk nan Aung San Suu Kyi le NLD party a soisel ruangah September 2018 ah NLD ihsin an dawisuak.

Thet Thet Khine in “Aung San Suu Kyi cu a hna ah amahten thuhla a tawlrel thei lo, bawlung sitnak hmun ah khuitawk team khalah bawlung va sit thei ringring vek a si” tin media hnen ih a sim ruangah NLD party ihsin an dawisuak.

Cutin People’s Pioneer Party (PPP) a dinsuak ih 2020 kum hrilawknak a tel nan nehnak a co lo, ralkap in thuneihnak an lak veten an kuthnuai ih hnaṭuan dingah an sawm ih arak cohlang. Cuvek dinhmun a si ruangah Htun Aeindra Bo khal Myanmar ramsung buainak ah thengre vuak tlak mi bangin a rep khepkhep an ti.

Be the first to comment

Leave a Reply

Your email address will not be published.


*