“Chin National Organization (CNO) ih Health Department hohanak in August 20, 2022 ni ah Ihkhun 50 tlem Suangdawn Siizung cu Falam peng ah tuanvo nei upa pawl in ribbon tannak thawn onnak an nei.
Onnak Program ah Chin National Defence Force (CNDF) ih Chief of Staff Salai Peter Thang ih hohanak in Chin thantar upatpeknak, Ram le miphun hrang nunnak liamtu Martyr pawl upatpeknak le Chin National Anthem saknak neih a si ih local Pastor ih hramthok thlacamnak in program hmangthok asi.
Cui hnuah Chin National Organization (CNO) ih General Secretary Salai William Chin in Hramthoknak Thucah simnak a nei ih Assistant General Secretary (2) Salai Joseph in NUG Minisry Of Health leh ICNCC ih kuatmi Capi siarnak a nei.
Suangdawn Siizung thar hrang apnak thlacam neih a si hnu ah CNO Assistant General Secretary (1) le CJDC General Secretary a tuantu Salai Timmy in Thusimnak a nei ih Khuanu/Khuapa aiawh in Pu Con Bawi in Thucah simnak le Sunloihnak Capi peknak a nei.
Siibawi Dr. Myo Thu le PDF-Kalay ih Ralbawi Jelly in Thucah simnak an nei ih CNO ih Health Department Secretary Salai Lai Lian Hmung in Lungawithu simnak a neih hnu ah Program baannak thlacamnak neih a si.
A tu ih Onnak neihmi siizung hi kum 2021 CNO/CNDF din thok ihsin damlo zohnak thawn hramthok a rak si ih October 2022 ihsin Siizung ah hmangthok in PDF-Kalay ih Siibawi pawl thawn tuantlang in hliamhma tuarmi mipi ralkap pawl operation tuahnak, nausarnak le mipi pawl ih hardamnak zohkhennak an nei rero a si”. (#Chin National Organization)
Leave a Reply