Indonesia Thawnginn A Kang Ih Thawngtla 41 An Thi

Indonesia khawpi Jakarta kiang ih um thawnginn tum zet cu September 8 zanṭim laiah a kang ciamco ih thawngtla 41 an thi, 80 in hliam an tuar ih 8 cu an hliamtuar a bese tuk ruangah Tangaran General Hospital ah an tlanpi cih.

Tangerang prison thawnginn cu misual turu pawl an retkhawmnak hmun a si, thawngtla 1,225 zat hrangih tuahmi thawnginn a si nan tu’ahcun thawngtla 2,000 lenglo an um. Tuiṭum ih a kannak hmun cu Block C a si ih ritheih sii tham pawl an ret khawmnak hmunpi a si.

Ziangtin kangmei a suak ti cu an thei hrih lo ih an zingzoi rero lai. An zumdan cun meisa hri ihsin kangmei suak thok si an zum. Zan an itthat laitak ah kangmei cu a suak ih ṭhenkhat cu tlansuak thei loin room sungah an kang that.

Runsuaktu pawlkom in an buaipi rero hnu zinglam nazi 3:00 hrawng lawngah kangmei cu an thelhmit thei. Thawnginn a kang ruangah an buai vutvo ih, thawngtla ṭhenkhat an rak tlansuak pang ding ti an phang ruangah ralkap le palik tampi in thawnginn cu an kulh thluh, Indonesia ramah thawngtla tlansuak tum an um asilen kangmei an tuah hrim ṭheu.

Be the first to comment

Leave a Reply

Your email address will not be published.


*