Inn Pakhat Ah Minung 4 That An Si

England, Killamarsh, Chandos Crescent ih um innsang nu pakhat le a fale 2, a fanu ih ruapi pawl cu zankhat ah misual in an that. Innsang pabik Jason Bennett cu khua dangah arak um ih thuthangsia a theih veten mitthli thawn inn lamah a tlung.

September 19 zarhte zan ih thilthleng a si ih a thaizing sunday zing lawngah an sungkhat pawlin an thei. Innsang nubik kum 35 mi Terri Harris, a fanu kum 11 mi le a fapa kum 13 mi pawl cu that an si, cun a fanu ih rualnu kum 11 mi Connie khal an inn ah arak riak ngelcel ih that a si ve.

Vengsung mipi pawlin police an ko lohli ih rinhlelmi mipa kum 31 mi cu an kai. An inn ih riak Connie ih pa in, “Ka fahniang in mual in liamsan, ka ton vek hi nan ton ding ka duh lo. Ka tuarnak hi ṭongkam in ka relsuak thiam lo” tin a ṭap rero.

Mr Bennett khal mitthli thawn inn ava thleng ih, “Ka thinlung a kekkuai thluh. Nulepa pawl nan fale kiangah caan hmang tam uh, ziang thil a thleng ding ti kan theicia lo. Ka hmusal nawn lo ding ti hi ka zum thei lo, ka pom in ka hnam cak tuk hai. Ka lungthin a kekkuai thluh” tin a ṭap.

An vuinak caanserh ah minung tam zetin an telve ih an riahsiatnak an langter. Himi tualthat thuhla thawn pehpar in mipa kum 31 mi an kai nan thuhla cipciar cu police pawlin an relsuak hrih lo. Thuhla zingzoi ding a tam tuk lai an tiih, cun himi zan ih thilthleng theitu, thawmvang rak theitu nan um asilen police sakhan ah in ra sim thei lohli uh tin theihternak an tuah. (#Daily Mail)

Be the first to comment

Leave a Reply

Your email address will not be published.


*