Innsang Cawmtu Mino Cu Ralhrang Pawlin An Kap That

Shan State, Nwa Bang Gyi khua ih um mino kum 21 mi Maung Zin Min Khaing cu an innsang cawmtu a si. February 14, 2022 simlam ah a hnaṭuannak loram ihsin a tlun ih ralhrang pawlin a dunglam ihsin an kap ciamco.

Tualsung mi pakhat in, “A nulepa cawmtu mino te a si. Ralhrang pawlin san le vang um loin an kap that, a dunglam ihsin vei 20 lenglo an kap ciamco ih a hmun ah a thi cih. A ruak khal motor thawn an phur” a ti.

Himi hnuah ralhrang pawl cu an khuasung ah an va lut ih san um loin mino 3 an kai bet, an kaihmi mino pawl cu kum 18 ihsin kum 20 karlak mi hlir an si ih hmundang ah an hruai. Cuvek thotho in zinglam nazi 10:00 hrawngah Ahlone khua kiangah ralhrang pawlin motor pakhat cu an kap ciamco.

Kiangkap ih um in, “Ralhrang pawlin motor cu an dingter ih an ding lohli thei lo, hmun hlan deuh ah an va ding cu an kap ciamco hngal. Motor sungah nunau lawnglawng an to, fala pakhat an kap ngah ih a cang thei nawn lo. A thisen khal a suak tam tuk ih a hliamhma tuar khal a nasa zet. Siizung ah an phur, ralhrang pawlin motor mawngtu khal kut an thlak ih motor thlalang pawl khal an sutkuai” a ti.

Be the first to comment

Leave a Reply

Your email address will not be published.


*