Innsang Nu Pakhat Cu Mopuai Ah Ava Feh Ih A Hlo

Mogok, Ohn Dan khua ih um innsang nu pakhat cu khua dangah mopuai ava hmang ih a hlo lanta. Kum 22 mi Ma Khin Thitsar cu May 26, 2022 sun ah sungkhat mopuai hmang dingin a feh, an khua ihsin motor 2 in an poksuak ih Kone Myint Thar Yar khua ah an feh. Rawl an khawh hnuah amahten a feh ih a hlo.

A pate in, “Mopuai hmang dingin an ra, motor 2 thawn an ra ih minung 60 hrawng an si. Rawlei khawh hnuah amahten a feh, ruah malte a sur. Ruahsur lakah a feh ih a hmuhmi ṭhenkhat khal a bia phah.

Ruah a sur ruangah korvar in a lu a khuh, a rualpi bike thawn a tlung ah kan ruat. Inn an thleng hnuah aum lo ti an thei, CCTV kan zoh ih amahten kung phahin a feh rero lai cu kan hmu. Khuitawk hmun ah a feh tum ti kan thei lo” a ti.

A hlotnak hi ni 4 a rei zo ih a thuhla zianghman theih ding aum lo ruangah a innsang pawl cu an thinhar zet. An sungkhat in, “A rualpi pawl khal kan sut thluh zo ih zohman in aumnak an thei lo. Hmun dangdang khalah kan hawl thluh zo nan kan hmu lo, mi kan pehtlaih thluh zo ih tutiang kan hmu thei lo. Tulai hi a harhdamnak a ṭha lo. Pasal nei pekte a si, a pasal le a innsang pawl khal an hawl rero lai” a ti.

Be the first to comment

Leave a Reply

Your email address will not be published.


*