Yangon, Insein khawpi, Aung San vengsung ih um taxi driver Ko Myo cu May 24 sun ah ralhrang pawlin kaih an tum ih an kai ngah lo ruangah a aiawh ah a nupi le a fapa kum 10 mi an kai.
May 24 sun nazi 2:00 hrawngah ralhrang 30 hrawng cu meithal thawn an vengsung ah an va lut ih lamzin pawl an kharpit thluh.
Vengsung mi pakhat in, “Ralhrang pawlin ‘na pasal na hmu lo asilen nan nufa in in thlun uh’ tin Mazin Moe Phyu le a fapa Maung Htet Pho Zar Ni cu an hruaisuak. An fapa hi kum 10 a lut fang, a pa aiah an kai. Ko Myo khal mipangai te a si, taxi mawng ih eihawl ṭheu a si. An innsang kai dingin hektu an um ruangah an kai” a ti.
Ralhrang pawl lakah hnipuan pangai hruh le thuthang petu pawl khal an um, an vengsung cu nazi 1:00 sung hrawng an kharpit ih zingzoinak an nei.
Ziangruangah Ko Myo hi kaih an tum ti cu theih a si lo vekin a nupi le a fapa an hruainak hmun khal theih a si lo. Ko Myo tei innsang cu himi vengsung ah kum 4 sung an um zo, an kaihmi a fapa hi a harhdamnak a ṭha lo ruangah an innsang pawlin an seherh zet.
Leave a Reply