Insein Thawnginn Ih An Khummi Mino 6 An Hlo Thutthi Ruangah An Innsang Pawl An Thinhar

Yangon, Insein thawnginn ih an khummi mino 6 ih thuhla cu an innsang pawlin an theih lo ruangah an thinphang. Ralkap pawlin thawngtla į¹­henkhat an rak hrem that zo ruangah an innsang pawl cu an thinhar tuk ti theih a si.

An kaihmi mino 6 cu bomb puak thuhla ruangih an kaihmi pawl an si. July 4 zinglam nazi 9:00 hrawngah Yangon, Aung Zeya lilawn parih um ralkap motor cu zo ti theih loin bomb in an deng puak.

Curuangah ralkap in vengsung ah zingzoinak an nei ih mino 6 cu rinhlel thu in an kai. An hmin cu Nyein Chan Ko, Manan Thu Thu Aung (Korea į¹­onglettu a si), kum 19 mi Maung Kawng Myat, kum 15 mi Maung Zin Min Htet, Ko Min Nyi, kum 17 mi Maung Zwe Ko pawl an si.

Insein thawnginn sungah an thuhla an theih lo ruangah an innsang lam in an zingzoi vivo ih mino 5 cu ralkap pawl ih kaihmi hmin cazin sungah an hmu, asinan pakhat Nyein Chan Ko ih hmin cu an hmu lo.

Cutin, Nyein Chan Ko ih thuhla an zingzoi sal ih hmun dang, ralkap pawl ih thusutnak hmun ah aum ti an thei. Asinan, an velh, an vuaknak hliamhma ruangah a thi zik te ti an thei. An sungkhat pakhat in “Ralkap thusutnak hmun ah aum ti kan thei, thi zikte in an vel. A thupten an hrem, an vuaknak ruangah a thi zikte. Thinphang um dinhmun ah aum” a ti.

Be the first to comment

Leave a Reply

Your email address will not be published.


*