New York, Long Island khawpi ih um fala kum 19 mi Alexis le a innsang pawlin Facebook company (Meta) cu taza an cuai rupri. Facebook in Instagram a lei zo ih thil ziangkim an pehtlaih aw thluh, Facebook in Instagram a kaihruai.
June 6, 2022 sun ah California, the United States District Court ah taza an va cuai, Facebook lam cun zianghman an letsawng hrih lo. Taza an cuainak cu an fanu Alexis in Instagram a atchilh, Instagram ruangah zianghman a tuah thei nawn lo.
Instagram ruangah rawl a ei duh nawn lo, beidonnak aneih phah ih mah le mah thatawk tiang a tum’ an ti. Alexis hi kum 11 mi a si lai ihsin Instagram account anei zo, Facebook le Instagram daan le dun ah kum 13 tlunlam lawng tuah an siang nan kum 11 mi a si laiah arak tuah thotho.
A nulepa ih theih loin a tuah ih a Instagram cu a thup thiam, Instagram in thilthar an sersuak cingcing ruangah Alexis in a thlah thei nawn lo. Ca khal a zir ṭha thei nawn lo, Instagram lawnglawng a tham ruangah a thluak fehdan a dik nawn lo ih siizung ah aum phah.
Curuangah an innsang zaten in Facebook (Meta) cu taza an cuai ih nauhak hrangah a ṭha lo tuk’ an ti. Alexis cu zianghman a tuah thei nawn lo, a tumtahmi pawl khal tuahsuak thei loin a nulepa kiangah aum. Online mipi pawlin nangmai thiamlonak ah midang taza nan cuai sawn’ an ti.
Leave a Reply