Internet An Phitnak Khua Mipi Pawl Cu Khualeng Ah Suak In Internet An Hawl Ṭheu, Thingkung Parah A Cak Cuang

Ralkap in Myanmar ramsung, khua ṭhenkhat cu internet le phone line pawl an phitsak thluh. Ramsung ih thuthang cu leitlun mipi in rak hmu ve lo hai seh an ti ruangah a si, cun mipi ralkap pawl khal pehtlaih aw thei hlah seh an ti ruangah internet line pawl an phit thluh.

Cumi phen ah nunrawng zetin an cangvai ih mi an that, nunau pawl an pawngsual ṭheu. Sagaing, Kawlin khuasung khal ralkap pawlin internet le phone line pawl an phitsak thluh ruangah khuasung mipi pawl cu internet le phone line hawl in khualeng ah an va suak ṭheu.

Tualsung mi pakhat in “Khua sung ah line zianghman aum lo, phone kan biak duh asilen khualeng ah kan va feh ṭheu. Internet khal khualeng hmun ṭhenkhat lawngah a ngah. Thingkung parah a ṭha cuang, thingkung parih internet hmang cu H+ ihsin 4G hmang vek a si. A caan ahcun khuitawk hmun khalah line aum lo” tin media hnenah a sim thei.

Internet le phone line an phitnak phen ah ralkap pawl hi nunrawng zetin an cangvai pang ding ti an phang zet. “A hlan khalah VPN lawng kan rak hmang ih a fuh thiṭha thei lo. Tu’ahcun line zaten an phit thluh ih a sia deuhdeuh, khuathim lakah ralkap pawl hi nunrawng zetin an cangvai pang ti kan phang” tin a sim tel.

Ralkap in September 26 zinglam nazi 6:00 ihsin Sagaing, Pinlebu ramsung, Kawlin ramsung le Wontho ramsung ih internet le phone line pawl an phit thok ih tutiang an phit lai.

Be the first to comment

Leave a Reply

Your email address will not be published.


*