Iraq Covid-19 Damlo Pawl Umnak Siizung A Puak Ih Minung 92 Hrawng An Thi

Iraq ram ih Covid-19 damlo pawl an tuamhlawmnak al-Hussein hospital cu July 12 zanah a puak thutthi ih mithi le hliamtuar an tam zet.

A puak pekte ah mithi 60 lenglo an um tin an tarlang lawk nan hliamtuar bese zetzet pawl cu an hliamhma tuar loin an thi vivo ruangah July 14 sun ahcun mithi 92 lenglo an um zo tin BBC thuthang ah an tarlang.

Kangmei a suahnak cu oxygen tank a puak ruangah a si, siizung a puak ruangah siizung ṭuanvo neitu minung 13 cu kaih theinak warrants an suah zo, cumi lakah an ramsung ih health chief Saddam Sahib al-Taweel khal a telve.

Mithi pawl ih innsang cu riahsia ninghang in lamzawh duhphorhnak an nei rero lai, an cozah daithlang ruangah tin duhphorhnak an nei.

Oday al-Jabri ih innsang member 4 khal siizung puak ah an thi, Oday al-Jabri in “Covid-19 damlo pawl cu damnak hawlin hitawk hmun ah kan hruai, asinan damlo le damlo pawl umpitu an innsang zaten an thi thluh sawn” tin a riahsiat thu a rel.

April thla khalah Baghdad ih siizung pakhat a puak ih minung 80 lenglo an thi, Baghdad siizung puak khal oxygen tank puak ruangah a si, himi ṭum ah Health Minister Hassan al-Tamimi in bannak ca a thehlut cih.

Iraq siizung sungih an cangvaihdan cu damlo pawl hrangah a hnangam um lo tuk ti a si, kangmei suak sehla humhim awknak ding khal zianghman an retcia lo ruangah damlo le an innsang pawlin an rak complain ṭheu nan siizung lamin “Sumpai kan nei daih lo” an ti.

Iraq ramsung ah Covid-19 damlo 17,000 lenglo an thi zo ih 1.4 million in nathrik an kai. Iraq mipi 40 million lakah one million hrawng lawngin Covid-19 khamsii aveikhatnak an dawt’aw lai tin WHO ah an ngankhum.

Be the first to comment

Leave a Reply

Your email address will not be published.


*