Israel Le Hamas An Remaw Zo, Asinan Hamas Fapa In Israel Hnenah ‘Hamas Hruaitu Pawl That Uh’ A Ti

May 10, 2021 ihsin Israeli Zionists le Hamas fighters (Palestinian) pawl an doaw ciamco ih inn le lo tampi an siatsuah. Ni 11 sung an doaw ih minung 244 zat an thi, Palestinians lam minung 232 zat an thi ih cumi lakah nauhak 65 an tel. Israel lam minung 12 an thi tin an nenhnget.

Egypt pawl ih tawlrelnak zarah an kahawknak cu an cawl thei. Egyptian President Abdel Fattah Al-Sisi in khatlam khatlam in a be veve ih remawknak tuah dingin a lem rero hnuah an tuah thei. Israel le Hamas an remawk thei ruangah leitlun ram hruaitu pawl khalin lungawipinak an langter celcel.

Asinan, Hamas hriamkai pawl ih an hotu Sheikh Hassan Yousef ih fapa Mosab Hassan Yousef in “Hamas hruaitu pawl that uh, an hruaitu pawl nan that asikhallen Hamas cu a hloral cuang lo ding. Nunzirhnak hrangah that uh” tin The New York Post hnenah a sim.

Mosab Hassan Yousef cu Hamas hruaitu Sheikh Hassan Yousef ih fapa a si. May 1978 kum ah a piang ih a pale pawl ih nunrawngzia a hmu ṭheu. Hassan Yousef in a fapa cu amah vek si dingin sual a zirh, a upat tikah Hamas hruaitu pakhat si dingin a kilkhawi nan a thinlung arak danglam.

Sual rawng a bawl duh lo ruangah a pale hnen ihsin a tlanhlo ih Israel Security Agency pawl hnenah aum. A hmin ah “The Green Prince” tin an ko, Hassan Yousef in “Ka fapa a si nawn lo” tin a phuang zo. 2018 kum ah US ram a thleng ih California ah nunthar thok in a khuasa lanta.

Kum 43 mi Mosab Hassan Yousef in “Hamas nauhak tete an thihnak a san cu Hamas hriamkai pawl ruangah a si. Hamas hriamkai pawlin an fale an duhdawtnak aiin Israel an huatnak hi a tum sawn. Tuiṭum an doawknak ah Gaza mipi pawl daiten an umnak cu Hamas lam an tang ruangah a si lo.

Hamas pawl an ṭih ruangah daiten an um sawn. Hamas pawlin anmah soiseltu, dodaltu cu an that, an thlaithat ṭheu. An innsang zaten an that ṭheu ruangah Gaza mipi pawlin an soisel ngam lo, ka pale pawl nan that asikhallen kan lo kham lo ding. Nan dungah ka ra lo ding” a ti.

Be the first to comment

Leave a Reply

Your email address will not be published.


*