Italy Sibawi In A Tuamhlawm Mi Damlo Nunau Cu A Itpi Asilen An Dam Ding Thu A Sim Ṭheu

Italy ram ih siibawi hminthang kum 60 mi Dr. Giovanni Miniello hi a danglam zet. Nunau damlo a tuamhlawmmi pawl cu amah thawn an ittlang asilen damnak an ngah ding thu a sim thei ih damlo nunau tam zet a bum ngah zo.

A thuhla an theihsuahdan cu damlo nunau kum 33 mi Anna Maria in a sunglam a ṭha thei lo ruangah ava pan, siibawi cun midang vek thotho in arak thlem ih sullam damlonak a neih thu a sim thei. A damlonak ruangah nau khal a keng thei lo dingih a rei tikah a natnak hi cancer ṭihnung zet ah a cang thei arak ti.

Asinan, amah thawn an ittlang asilen a natnak cu a hlo vuarvi ding a ti, a taksa ah natkhamnak siivai a dawt’aw zo thu a sim thei ih cumi in nunau sul sungih um nathrik cu a thianfai thei tin a bum. A tuamhlawm lai khalah a pawhte a thamsak ih “Nunau pawhte te hi ka ngaina tuk, cancer nat ihsin nunau tampi ka rak runsuak zo” a ti.

Anna Maria in a thilton cu tualsung media La Iene TV show hnenah a sim thei ih La Iene TV show pawlin sibawi nunrawng ih cangvaihdan cu haisuak dingin lemcan thiam an ruai. Nunau lemcan thiam cu sullam damlo vekin an va piahawkter hrim ih sibawipa thawn ittlang dingin a lungkim.

Cutin hotel ah an ittlang zik ciah tiah La Iene TV show pawlin an va lutchilh ih a thiltuah ṭheumi cu an kai ngah. Hotel sungah cun sibawi cu a kor khal arak phelh’aw thluh zo, sibawi in, “Minung nunnak tampi ka runsuak zo. Kum 40 sungah nunau 100 lenglo ka rak tuamhlawm dam. Damlo nunau pawl hi in itpi dingin ka nor dah lo, an duhhrilnak in ka tuamhlawm dam” a ti.

Thuneitu pawlin sibawi hur cu an kai zo ih an thuhla cu an zingzoi vivo ding, arak tuamhlawmmi nunau tam zet khalin thubuai an ra thehlut ve ih ṭhenkhat cu natnak hi an ṭih ruangah sibawi ih fial vekin an cangvaih thu an phuangaw.

Be the first to comment

Leave a Reply

Your email address will not be published.


*