Japan Pawl Ih Thlahrang Ṭihnung ‘Oiwa’

17th century laiah Japan ram ah thlahrang ṭihnung um zet arak um. An thuanthu cu: Khua pakhat ah Oiwa timi fala mawi zet arak um ih Samurai pasalṭha thawn an neiaw. An khuasung ih fala Oume in Oiwa ih pasal cu arak duh tuk ve ih a atchilh.

Oume in Oiwa cu a thik tuk ih a hmu thei lo, nikhat cu Oiwa ih hmanmi taksa hnih cream sungah tursia arak rawi. Oiwa in zianghman thei loin cream cu a taksa parah a hnih ih tursia in a taksa cu an ei ciamco, a mit pakhat a pawtsuak ih a sam pawl khal an thlong.

Cutin, a hmel cu a sia thluh ih zoh a ṭha nawn lo, a pasal Samurai in ṭhen a tum ih fala Oume thawn neihawk an tum, Samurai in a rualpa Takuetsu cu a ruai ih a nupi Oiwa cu a pawngsualter, cutin a pawngsual hnuah thubuai nei in ṭhen a tum.

A rualpa Takuetsu in Oiwa cu ava pawngsual tum nan a hmel a hmuh veten a tuahmawh ngam lo, a lau tuk. Takuetsu in Oiwa cu a zangfak sawn ih a pasal ih lungthlitum pawl a sim thei. Oiwa cu a lungkuai ih a ṭap ciamco hnuah Takuetsu ih nam a laksak ih a thataw. A hnukcat hlante ah Oiwa in a pasal hmin sal in a camsiat.

Cumi hnuah a pasal Samurai le Oume cu an rung neiaw, an neihawk zan ah Oiwa ih thla a hrang ciamco. A pasal Samurai ih ruahnak pawl a tibuai ih a nupi thar Oume le a nupi ih pa cu an neihawk zan ah a that.

Samurai cu hmun dangdang ah a tlankual nan a nupi Oiwa thla in a thlun vivo ih a tibuai ringring, zan a mang tiangah a tibuai ṭheu ruangah umngaihnak a thei lo. Cutin harsa zet ih aum laiah a thatmi a nupi thar Oume ih tlangval hlun Yomoshichi in phuba la in Samurai cu ava that. Oiwa ih thla cu thinheng in hmun dangdang ah a hrang vivo.

Be the first to comment

Leave a Reply

Your email address will not be published.


*