“Jesuh Cu Kamsang A Si” A Ti Ruangah Thihdaan An Orhter

Pakistan, Lahore khawpi ih um pacang kum 34 mi Masih cu Chrisntian miṭha zet a si, a nupi thawn fanu pakhat an nei. An inn ah bike tuahnak dawr a ong.

June 2017 ah pacang pakhat in a bike ava tuahter ih sumpai a pe duh lo, bike tuahter tu in, “Muslim sakhuanak ih upa pakhat ka si. Sumpai in dil hlah” a ti. Masih in, “Kei cu Jesuh zumtu ka si, Jesuh cu kamsang a si ih nan sakhuanak thuhla ah ka lung a lut lo. Ka hnaṭuan man cu in pe aw” a ti.

Bike tuahter tu cu a thinheng tuk ih an sakhua upa pawl hnenah zual a ko ih palik hnenah thubuai an thehlut. Muslim zawlnei a thangsiat tin diklo zetin taza an cuai. Masih cu an kai ih kum 5 sung thawng an thlak hnu July 4, 2022 ah thi dingin a thu an ṭhencat.

Hridai thawn thlai that ding a si, an that ding ni le caan cu an phuang hrih lo. A upa in, “An thuṭhennak thuhla kan theih veten kan innsang ah mitthli a luang. Kan khawvel cu a cem ah kan ruat” a ti.

Masih in, “Diklo zetin thubuai in tuahsak. An sakhuanak hi ka dodal lo, an zawlnei khal ka upat. Thubuai in tuahtu hi kan innhmai ih um a si, an inn ah bike tuahnak dawr an ong ve nan ka hnenih bike tuah an tam sawn ringring ruangah in thik.

Buainak khal kan rak nei phahphah zo, thubuai tuah duh ah bike ara tuah ih thiamlo in coter. An sakhuanak ruangah bike tuah man in pe tum lo ih kei cu Jesuh zumtu ka si, nan sakhuanak thuhla hi ka thei lo. Ka hnaṭuan man cu in pe aw ka tiih diklo zetin in hek” a ti.

Be the first to comment

Leave a Reply

Your email address will not be published.


*