Joe Biden “Afghans Ralkap Ih Do Duhlomi Ah US Ralkap Pawl An Thih A Ṭul Nawn Lo” A Ti, US Mipi Auaw “Kan Fanu, Fapa, Kan Pasal, Nupi Pawl Ih Thihnak Cu Thuhlolak Ah A Cang

Afghanistan ramsung ah kum 20 lenglo Britain, America le UN ralkap pawl umhmun an va khuar zo ih Taliban tapung pawl an do rero. An doawknak ah mithi khal an tam zet, kum 20 hnuah an ralkap pawl cu an ko kirsal ih Taliban pawl khal an ra langsal.

Afghanistan hruaitu pawl cu hmun dang ah an tlan ih Taliban pawlin thuneihnak an la, doawknak khal um mumal loin Taliban pawlin Afghanistan ram cu awlsamten an la thei.

US President Joe Biden in “Trillion dollars kan hman cem zo, Afghans pawl cu caanṭha vei tampi kan pe. Asinan an hmailam caan hrangah ral kan dosak thei nawn lo, Afghan ram hruaitu pawl khal an beidong zo ih an ram an tlansan.

Raldo an tum lo, US ralkap pawlin an aiah harsatnak phunphun an tuarsak rero zo. Anmah Afghan pawl ih do duhlomi cu US ralkap pawlin kan do thei nawn lo, an hrangah kan thi thei nawn lo” a ti.

US ralkap Pte James Prosser khal 2009 kum ah Afghan ram ah a thi. US ralkap 21 cu motor thawn an tlan laiah bomb kammi an pal ngah ih an puak that thluh.

James ih nu Sarah Adams in “Mizan cu ka itthat thei lo, Afghan mipi pawl ih tuarnak ka hmu ih ka zangfak tuk. Ka fapa ih thihnak cu thuhlolak si lo hram seh ti duhthu ka sam. Kum 20 sung kan rak zuam rero mi cu ni reilote sungah an hloral thluh. Kan fapa, fanu 457 zat le kan unau, nupi pasal (USA ralkap pawl) ih thihnak cu thuhlolak ah a cang” tin BBC hnenah a sim.

Be the first to comment

Leave a Reply

Your email address will not be published.


*