Joe Biden “Pa Pawl Nan Zaten Happy Father’s Day, Ka Pa Tello In >>>

June 20, 2021 cu leiltun huap Father’s Day a si ih USA president ṭuanlai Joe Biden in leitlun pa zaten hnenah duhsaknak a hlan. USA president ṭuan zo pawlin pai ni hi an rak ruat thupi tuk dah lo ih pai ni ah duhsaknak khal an rak hlan dah lo.

Joe Biden in “Ka pa in ‘nunau le mipa hrangah paṭha, nuṭha si aiin thil ropi sawn aum lo arak ti. Nitinten fale hrangih hnaṭuan rerotu pa pawl, nan zaten Happy Father’s Day…” tin a Instagram ah a tarlang.

December 1972 ah Joe Biden ih nupi hmaisa Neilia Hunter Biden le a fanu kumkhat mi cu Christmas thilri lei dingin an bazar ih lamzin ah motor accident in an thi, cumi ṭum ah Joe Biden cu arak beidong tuk.

Asinan, hringtu a pa ih thazang peknak ruangah thazang thar a ngahsal, a pa in “Mi pakhat ih hlawhtlinnak cu vei ziangzat a tlu ti aiin a tluknak ihsin a tho lohli maw ti hi a thupi sawn…” arak ti.

Joe Biden le a pa Joseph R. Biden Sr. hi pafa nelaw zet an si ih an pehtlaihnak khal a ṭha, a pa Joseph R. Biden hi pacang ṭha zet a si. World War II hnuah hnaṭuannak anei nawn lo ih an tlusia thluh, Joseph R. Biden khal beidong in zu tama ah a suak lawk.

Asinan, kumkhat hnuah a nupi le fanau pawl ruat in a zu tama sinak ihsin a thosuak sal ih hnaṭuan in a nupi fanau pawl cu a kilkhawi. Joe Biden in “Ka pa tello in Father’s Day ka hmang hmaisabik nak ding a si, August 2020 ah ka pa kum 95 mi in in thihsan. Ka pa in thildang aiin pacang ṭha sinak hi arak ngai thupi tuk” a ti. (Happy Father’s Day)

Be the first to comment

Leave a Reply

Your email address will not be published.


*