Johnny Depp Tei Nupa Cu Nasa Zetin An Buai Hnuah An Nu In “Thinlung Takten Ka Duh Tuk Lai” A Ti

Kum 59 mi Johnny Depp le a nupi hlun Amber Heard (kum 36) cu leitlun ih milar hminthang veve an si. 1990 kum ih an tlangthan mi ‘Cry-Baby’ zuknung ihsin Johnny Depp cu leitlun mipi pawlin an hmeltheih.

2011 kum ah ‘The Rum Diary’ timi zuknung an cangtlang ih an duhaw, 2015 kum ah an neiaw ih 2017 kum ah kaphnih lungkimnak in an ṭhenaw sal. An ṭhenawk hnuah Amber Heard in a pasal hlun cu a thangsiat, a sii rit lai zuk le a zurit lai video pawl cu online parah a pholang ih media tumpi pawl hmaiah a pasal hlun cu hminsia dingin a tuah.

Johnny Depp cu mipa diktakin daiten arak um ringring lawk, Amber Heard ruangah Johnny Depp cu a hminsia tuk ih a sumdawngnak khal a tlasia phah, zuknung khawvel sung khalah ngainatu anei mal phah. Curuangah Johnny Depp in a nupi hlun cu taza a cuai ih court hmaiah an thiamthu an rel veve.

Mipi in an rak hmuhmi cu Johnny Depp ih thiamlonak lawng a si, himi phenah Amber Heard ih thiamlonak tam zet aum ti an theisuak. Court in an thuhla a zingzoi vivo hnuah Amber Heard cu thiamlo an coter ih diklo zetin mi a thangsiat ruangah USD 15 million an kuanter nan thuṭhentu in USD 10.35 million lawng kuan dingin a thumsak.

Johnny Depp in, “Himi cu sumpai thuhla a si lo. Sumpai cu ka la zik lo. Ka hmin, mizia siami pawl tuahṭhatnak a si” a ti. Hitin an buai ciamco hnuah media picang in Amber Heard cu hmaiton thusutnak an va nei ih Amber in, “Ka thiltuahmi parah ka siraw tuk. Ka thinlung takten ka duh tuk lai. A parah thinlungsia zianghman ka nei lo, theithiam harsa nan ti men ding. Mi pakhat khat nan duhdawt zo a si ahcun nan theithiam awl ding” a ti.